ខ្ញុំបាទមិនដឹងថា ប្រូមូហ្សិន លក់បង្កងនៅតាមបណ្តាផ្ទះមាត់កំពង់ទីរួមខេត្តតាកែវ ករណីលក់បង្កងស្រស់ៗ មិនចេះអស់នោះជាការពិត ឬយ៉ាងណាទេ? ខ្ញុំបាទមានបងប្អូននៅឯស្រុកអង្គរបុរី បានប្រាប់ថា ឆ្នាំនេះ នៅស្រុកអង្គរបុរីគ្មានបង្កងនោះទេ ដោយសារតែទឹកតូច ។ មួយឆ្នាំនេះ នៅស្រុកអង្គរបុរី ប្រមូលបង្កងមិនបាន១០០គីឡូក្រាមផង គឺតាំងពីអំឡុងខែវិច្ឆិកា កន្លងទៅ។ ប៉ុន្តែមកដល់ពេលនេះ អ្នកលក់បង្កងនៅទីរួមខេត្តតាកែវ បន្តអះអាងថា បង្កងខេត្តតាកែវនៅតែមានមិនខ្វះ ហើយអាចកុម្មង់បានគ្រប់ពេល ។
បើតាមខ្ញុំដឹង តាមរយៈបងប្អូននៅឯស្រុកអង្គរបុរីនោះថា បង្កងដែលគេដាក់លក់នៅទីរួមខេត្តតាកែវសព្វថ្ងៃ ជាបង្កងចិញ្ចឹមនាំមកពីប្រទេសវៀតណាម ។ ការទទួលទានបង្កងចិញ្ចឹមដែលមានចាក់បញ្ចូលសារធាតុគីមីក្នុងខួរបង្កង នាំឲ្យប៉ះពាល់ដល់សុខភាពអ្នកទទួលទាន ។ និយាយយ៉ាងដូច្នេះមិនមែនមានន័យថា មានចេតនាធ្វើឲ្យប៉ះពាល់ដល់អាជីវកម្មរកស៊ីរបស់អាជីវករនៅមាត់កំពង់ទីរួមខេត្តតាកែវនោះទេ ។ ប៉ុន្តែការរកស៊ីដែលបោកប្រាស់គួរតែលុបបំបាត់ ។
អ្វីដែលបាននិងកំពុងកើតឡើងអំពីបញ្ហាបង្កងដ៏ល្បីល្បាញនៅខេត្តតាកែវនោះ គឺមានន័យថា បង្កងដែលគេដាក់លក់ ជាបង្កងដែលនាំមកពីប្រទេសវៀតណាម ។ បង្កងបែបនេះមានតម្លៃប្រហែល១០ដុល្លារក្នុងមួយគីឡូក្រាម ។ វាអន់ជាងបង្កងដែលចីញ្ចឹមនៅក្នុងស្រុកនោះទៅទៀត ។ តើអាជ្ញាធរខេត្តតាកែវនៅតែបន្តឲ្យមានការលក់ដូរបោកប្រាស់នេះតទៅទៀត ឬយ៉ាងណា? ៕
ដោយ៖ ប្រជាពលរដ្ឋម្នាក់
