មន្ត្រីបានលើកឡើងថា ជើងហោះហើរមួយគ្រឿងរបស់កាណាដាត្រូវបង្ខំឲ្យចុះចតជាបន្ទាន់ បន្ទាប់ពីយន្តហោះនេះទទួលរងការកួចពីខ្យល់បណ្តាលឲ្យរងរបួស២១នាក់ ក្នុងនោះមានក្មេង៣នាក់ផងដែរកាលពីថ្ងៃទី៣១ ខែធ្នូ ឆ្នាំ២០១៥។
អាកាសចរណ៍ Air Canada ហោះហើរពីទីក្រុងសៀងហៃឆ្ពោះទៅកាន់ទីក្រុងតូរ៉ុនតូនោះត្រូវបង្ខំចុះចតជាបន្ទាន់ស្ថិតនៅអាកាសយានដ្ឋានក្នុងទីក្រុង Calgary ប្រទេសកាណាដា បន្ទាប់ពីទទួលរងការបក់បោកពីខ្យល់កួចនោះ ។
អ្នកដំណើរ៨នាក់បានរងរបួសនៅត្រង់ក និងខ្នង និង១៣នាក់ផ្សេងទៀតត្រូវបញ្ជូនទៅកាន់មន្ទីរពេទ្យដើម្បីពិនិត្យ និងព្យាបាលរបួស ។ អ្នកនាំពាក្យក្រុមសង្គ្រោះបន្ទាន់អះអាងថា អ្នករងរបួសទាំងនេះមិនគំរាមកំហែងដល់អាយុជីវិតនោះឡើយ ។
អាកាសចរណ៍ Boeing 777 ដែលមានអ្នកដំណើរ៣៣២នាក់ និងអាកាសយានិក១៩នាក់បានចុះចតជាបន្ទាន់ស្ថិតនៅអាកាសយានដ្ឋានក្នុងទីក្រុង Calgary ប្រទេសកាណាដា ។ ប្រធានប្រតិបត្តិអាកាសចរណ៍ Air Canada លោក Klaus Goersch បានអះអាងថា អ្នកដំណើរទាំងអស់ មិនមានគ្រោះថ្នាក់ដល់អាយុជីវិតនោះទេ ៕
ប្រែសម្រួល៖ ថាច់ យ៉ាត
