ភ្នំពេញ៖ បុរសមិនស្គាល់ឈ្មោះម្នាក់ដែលស្រវឹងជោកជាំ បានបើកបរម៉ូតូរអិលខ្សាច់ត្រង់ការដ្ឋានដាក់លូ ដួលសន្លប់ឈឹងស្តូកស្តឹង នៅមុខក្រុមហ៊ុន(អិលជី) លើកំណាត់ផ្លូវឧកញាម៉ុងឫទ្ធី ក្នុងសង្កាត់ទួលសង្កែ ខណ្ឌឫស្សីកែវ បង្កការភា្ញក់ផ្អើលកាលពីវេលា ម៉ោង១ និង៨នាទីរំលងអធ្រាត្រឈានចូលថ្ងៃទី២ ខែមករា ឆ្នាំ២០១៦ ។
តាមប្រភពពីកន្លែងកើតហេតុ ជនរងគ្រោះមិនត្រូវបានគេស្គាល់ឈ្មោះអត្តសញ្ញាណទេ ។ ហើយករណីគ្រោះថា្នក់នេះគឺកើតឡើង ខណៈដែលបុរសជាជនរងគ្រោះ បើកបរម៉ូតូម៉ាកហ្វីណូ ពណ៌ស្វាយ ពាក់ស្លាកលេខ ភ្នំពេញ1AR-7770 មួយគ្រឿង ក្នុងទិសដៅពីលិចទៅកើត ក្នុងស្ថានភាពស្រវឹងជោកជាំ។ លុះដល់ចំណុចកើតហេតុខាងលើ ស្រាប់តែរអិលនឹងខ្សាច់ដែលគេកាយដាក់លូ បណ្ដាលឱ្យដួលបែកមុខមាត់ហើយសន្លប់ឈឹងតែម្តងទៅ ។
ក្រោយពេលកើតហេតុ រយៈពេលប្រមាណជាងកន្លះម៉ោង ទើបឃើញមានរថយន្តសង្គ្រោះរបស់មន្ទីរពេទ្យកាល់ម៉ែត មកដឹកបញ្ជូននាំយកជនរងគ្រោះទៅព្យាបាល រីឯម៉ូតូត្រូវបានសាច់ញាតិមកទទួលយកទៅផ្ទះវិញ ៕
ដោយ៖ វិបុល
