មន្ត្រីជាន់ខ្ពស់មួយរូបរបស់ប្រទេសឥណ្ឌាបានថ្លែងឲ្យដឹងថា ក្រុមខ្មាន់កាំភ្លើងមានគ្នាប្រមាណ៤ទៅ៥នាក់បានវាយប្រហារមកលើបន្ទាយកងទ័ពជើងអាកាសឥណ្ឌាដែលមានមូលដ្ឋានស្ថិតនៅជិតព្រំដែនជាប់ជាមួយប្រទេសប៉ាគីស្ថានកាលពីថ្ងៃទី១ ខែមករា ឆ្នាំ២០១៦ ។ ការវាយប្រហារនេះនៅតែបន្តកើតឡើងជានិច្ច ហើយនៅពេលនេះ ខ្មាន់កាំភ្លើង៤នាក់ និងកងកម្លាំងសន្តិសុខ២នាក់បានបាត់បង់ជីវិត ។
ថ្លែងប្រាប់ប្រភពព័ត៌មាន AFP ស្នងការប៉ូលិសក្នុងតំបន់ លោក Kunwar Vijay Partap Singh បានបញ្ជាក់ថា បន្ទាយកងទ័ពជើងអាកាសស្ថិតក្រោមការវាយប្រហារពីក្រុមភេរវកម្មដែលមានគ្នាពី៤ទៅ៥នាក់ កាលពីវេលាម៉ោង៣និង៣០នាទីទៀបភ្លឺ ។ ការផ្ទុះអាវុធនៅតែបន្តកើតឡើងនៅឡើយ ។
លោក Kunwar Vijay Partap Singh បានបន្ថែមថា ខ្មាន់កាំភ្លើង២នាក់ត្រូវគេជឿថា បានបាត់បង់ជីវិត ខណៈដែលអ្នកដែលនៅសេសសល់កំពុងលាក់ខ្លួនពួនអាត្មានៅក្នុងអគារមួយស្ថិតខាងក្នុងបន្ទាយកងទ័ពជើងអាកាសនោះ ។
លោកបន្តថា គ្មានការខូចខាតទៅដល់យន្តហោះចម្បាំងដែលស្ថិតនៅក្នុងបន្ទាយនោះឡើយ ហើយនៅពេលនេះ កងកម្លាំងសន្តិសុខកំពុងតែប្រមាញ់ក្រុមជនវាយប្រហារទាំងនេះ ៕
ប្រែសម្រួល៖ ថាច់ យ៉ាត
