ខេត្តកណ្តាល៖ សមត្ថកិច្ចនគរបាលស្រុកកោះធំសហការជាមួយនគរបា់លប៉ុស្តិ៍រដ្ឋបាលពោធិ៍បានធ្វើការស្រាវជ្រាវឃាត់ខ្លួនជនសង្ស័យ២នាក់ ដកហូតបានថ្នាំញៀនប្រភេទមេតំហ្វេតាមីន ហៅម៉ាទឹកកកចំនួនមួយកញ្ចប់ ,ម៉ូតូម៉ាកហុងដាគុបមួយគ្រឿង និងទូរស័ព្ទដៃមួយគ្រឿង ដើម្បីកសាងសំណុំរឿងចាត់ការតាមច្បាប់ ។
ប្រតិបត្តិការបង្ក្រាបបទល្មើសគ្រឿងញៀននេះបានធ្វើឡើងកាលពីវេលាម៉ោង១៦ និង៣០នាទី ថ្ងៃទី០១ ខែមករា ឆ្នាំ២០១៥ នៅលើកំណាត់ផ្លូវជាតិលេខ១១០ ស្ថិតក្នុងភូមិថ្មី ឃុំពោធិ៍បាន ស្រុកកោះធំ ខេត្តកណ្តាល ។
អធិការនគរបាលស្រុកកោះធំលោកវរសេនីយ៍ត្រី ឈឿន ប៊ុនឆន បានឲ្យដឹងថា ជនសង្ស័យទី១-ឈ្មោះ ហ៊ត អប ភេទប្រុស អាយុ២១ឆ្នាំ ជនជាតិខ្មែរ មុខរបរ កសិករ មានទីលំនៅក្នុងភូមិព្រែកតាអ៊ិន ឃុំ ពោធិបាន ស្រុកកោះធំ ទី២-ឈ្មោះ ផន ប៉េងលាង ភេទប្រុស អាយុ២៩ឆ្នាំ ជនជាតិខ្មែរ មុខរបរ កសិករមានទីលំនៅក្នុងភូមិថ្មី ឃុំពោធិ៍បាន ស្រុកកោះធំ ។
លោកវរសេនីយ៍ត្រី ឈឿន ប៊ុនឆន បានបន្តថា ជនសង្ស័យទាំង២នាក់នេះជាមុខសញ្ញាដែលសមត្ថកិច្ចនគរបាលកំណាត់ និងតាមដានជាយូរមកហើយ តែកន្លងមកមិនមានវត្ថុតាងដើម្បីដាក់បន្ទុកចាប់ខ្លួនជនសង្ស័យ ។ លុះមកដល់ថ្ងៃទី១ ខែមករា ឆ្នាំ២០១៦ សមត្ថកិច្ចនគរបាលទទួលបានព័ត៌មានថាជនសង្ស័យមានលាក់ទុកថ្នាំញៀននៅជាប់ខ្លួន ទើបសមត្ថកិច្ចនគរបាលស្រុកសហការជាមួយនគរបាលប៉ុស្តិ៍រដ្ឋបាលចុះធ្វើការស្រាវជ្រាវ ឈានដល់ធ្វើការឃាត់ខ្លួនជនសង្ស័យនិងវត្ថុតាង ដើម្បីកសាងសំណុំរឿងចាត់ការតាមច្បាប់ ៕
ដោយ៖ ស្អាងជ័យ
