ខេត្តព្រៃវែង៖ ជនសង្ស័យម្នាក់មានតួនាទីជាមន្រ្តីនគរបាលព្រហ្មទណ្ឌនៅខេត្តព្រៃវែង ត្រូវបានកម្លាំងនគរបាលព្រហ្មទណ្ឌកំរិតធ្ងន់ នៃស្នងការដ្ឋាននគរបាលរាជធានីភ្នំពេញ និងខេត្តព្រៃវែងចាប់ឃាត់ខ្លួន រួមជាមួយអាវុធចំនួន៣ដេីម និងរថយន្តមួយគ្រឿង ដែលអះអាងថា បានប្លន់យករថយន្តមួយគ្រឿងរបស់ជនរងគ្រោះដែលបានជួលជិះ។
យោងតាមរបាយការណ៍របស់ស្នងការដ្ឋាននគរបាលរាជធានីភ្នំពេញនៅថ្ងៃ ទី២៩ ខែវិច្ឆិកា ឆ្នាំ២០១៩នេះបានឲ្យដឹងថា ករណីនេះបានកើតឡើង កាលពីថ្ងៃទី១២ ខែវិច្ឆិកា ឆ្នាំ២០១៩ វេលាម៉ោងប្រហែល ១៖៣០នាទីរំលងអាធ្រាត្រ។
ជនសង្ស័យឈ្មោះ ជុត ជីវន្ត័ អាយុ២៧ឆ្នាំ មានតួនាទីជាមន្រ្តីនគរបាលព្រហ្មទណ្ឌនៅខេត្តព្រៃវែង រស់នៅភូមិបឹងព្រះ ស្រុកបារភ្នំ ខេត្តព្រៃវែង ។ ចំណែកជនរងគ្រោះឈ្មោះ ពុធ រិទ្ធី អាយុ៣៣ឆ្នាំ រត់តាក់ស៉ី រស់នៅភូមិត្រពាំងបុណ្យ ឃុំព្រៃគគីរ ស្រុកចន្រ្ទា ខេត្តព្រៃវែង។
ប្រភពព័ត៌មានជុំវិញករណីប្លន់យករថយន្តជនរងគ្រោះបានអោយដឹងថា កាលពីថ្ងៃទី១២ ខែវិច្ឆិកា ឆ្នាំ២០១៩ ជនសង្ស័យឈ្មោះ ជុត ជីវន្ត័ បានចេញពីលេងល្បែងនៅណាហ្គាវ៉ើល ជិះម៉ូតូឌុប ទៅច្បារអំពៅដើម្បីម៉ៅរថយន្តទៅខេត្តព្រៃវែង ពេលទៅដល់ក៏បានឃើញរថយន្តតាក់ស៉ី០១គ្រឿង ម៉ាក ហាយឡេនដឺ ពណ៌ ទឹកប្រាក់ ពាក់ស្លាកលេខ ស្វាយរៀង 2B-4517 ដែលម្ចាស់រថ យន្តជាមនុស្សធ្លាប់ស្គាល់គ្នាជិះរថយន្តទៅខេត្តព្រៃវែង ពេលនោះខ្លួនបានហៅម្ចាស់រថយន្តនោះឲ្យបើកជូនទៅខេត្តព្រៃវែង និងត្រឡប់មកភ្នំពេញវិញ។
ប្រភពព័ត៌មានបន្តថា ពេលបើករថយន្តដល់ខេត្តព្រៃវែង ជនសង្ស័យបានឲ្យម្ចាស់រថយន្តឈប់ចាំនៅច្រកខាងកើតចូលស្នងការដ្ឋាននគរបាលខេត្តព្រៃវែង ដោយជនសង្ស័យចូលទៅក្នុងបន្ទប់ដេកក្នុងស្នងការដ្ឋានយកអាវុធ AK ស្វាយបត់ ០១ដើម ដាក់ក្នុងសាក់កាដូស្ពាយក្រោយ ត្រឡប់ចូលរថយន្តវិញ ហើយឲ្យអ្នក បើកតាក់ស៉ី ជិះចូលមកភ្នំពេញវិញ ពេលជិះតាមផ្លូវជនសង្ស័យរកមើលកន្លែងស្ងាត់ ដើម្បីធ្វើសកម្មភាពប្លន់ រហូតមកដល់ផ្លូវបំបែកចូលរោងចក្រថៃហ្គ័រ សង្កាត់ព្រែកឯង ខ្លួនបានឲ្យអ្នកបើករថយន្តទៅតាមរោងចក្រថៃហ្គរ័ បានប្រហែល ១គីឡូម៉ែត្រ ក៏ដកអាវុធពីក្នុងសាក់កាដូ ភ្ជង់ម្ចាស់រថយន្តឲ្យចុះរួចយកកាបូបលុយ និងរថយន្តបើកត្រឡប់ក្រោយចូលភ្នំពេញវិញ តាមផ្លូវជាតិលេខ១ មកដេកនៅផ្ទះសំណាក់ និងយកសាកកាដូ និងអាវុធទុកក្នុងបន្ទប់ផ្ទះសំណាក់ ហើយខ្លួនបានយករថយន្តដែលប្លន់បានជិះមកណាហ្គាវ៉ើល។ លុះដល់ម៉ោងប្រហែល០៨ព្រឹក ខ្លួនបានពឹងសន្តិសុខ ណាហ្គាវ៉ើលឲ្យមនុស្សប្រុសម្នាក់មិនស្គាល់ឈ្មោះមកទិញរថយន្តក្នុងតម្លៃ ១៤,០០០ ដុល្លារ ហើយក៏គេចខ្លួនបាត់។
ក្រោយមកនៅថ្ងៃទី១៥ ខែវិច្ឆិកា ឆ្នាំ២០១៩ សមត្ថកិច្ចបានដកហូតរថយន្តម៉ាកហាយឡេនដឺពាក់ស្លាកលេខ ស្វាយរៀង 2B-4517 ពីឈ្មោះ យ៉ាន សំអុល នៅកន្លែងលាងឡានម្តុំបឹងត្របែកស្ថិតក្នុងសង្កាត់បឹងត្របែក។ លុះដល់ថ្ងៃទី២៧ ខែវិច្ឆិកា ឆ្នាំ២០១៩ វេលាម៉ោងប្រហែល២០ ពេលដែលខ្លួនកំពុងនៅផ្ទះក្នុងបុរីផុន ស៊ុយ សង្កាត់ចោមចៅទី១ ខណ្ឌពោធិ៍សែនជ័យ ក៏ត្រូវសមត្ថកិច្ចធ្វើការឃាត់ខ្លួន យកមកធ្វើការសាកសួរនៅការិយាល័យនគរបាលព្រហ្មទណ្ឌកំរិតធ្ងន់តែម្តង៕ ដោយ ៖ ជាយក្រុង
