ភ្នំពេញ៖ ហេតុការណ៍គ្រោះថ្នាក់ចរាចរណ៍មួយបង្កឡើងដោយសារតែរថយន្តមួយគ្រឿងបើកបរក្នុងល្បឿនលឿនខណៈមកដល់ចំណុចផ្លូវកោងមិនបន្ថយល្បឿនបានជ្រុលបុកឃឿនសួនច្បាររង្វង់មូលចោមចៅបណ្តាលអោយក្រឡាប់ផ្ងារជើងច្រងាង តែសំណងល្អមិនរងរបួសដល់មនុស្ស ។
ហេតុការណ៍នេះបានកើតឡើងកាលពីវេលាម៉ោង៤ ទាបភ្លឺថ្ងៃទី៤ ខែមករា ឆ្នាំ២០១៦ នៅចំណុចសួនរង្វង់មូលចោមចៅខាងត្បូង តាមបណ្តោយផ្លូវជាតិលេខ៣ ស្ថិតក្នុងភូមិថ្នល់បំបែក សង្កាត់ចោមចៅ ខណ្ឌពោធិ៍សែនជ័យ ។
តាមសាក្សីនៅកន្លែងកើតហេតុបានអោយដឹងថា នៅមុនពេលកើតគេបានឃើញរថយន្តកុងតឺន័រ ពណ៌ទឹកប្រាក់ ឆ្នូតខៀវពាក់ស្លាកលេខតាកែវ3A-0120 ធ្វើដំណើរតាមបណ្តោយផ្លូវជាតិលេខ៤ក្នុងទិសដៅពីលិចទៅកើត ក្នុងល្បឿនលឿនខណៈមកដល់ចំណុចកើតហេតុបានបួងចង្កូតបត់ស្តាំទៅតាមផ្លូវជាតិលេខ៣វិញ ដោយបួងមិនទាន់ក៏ជ្រុលបុកឃឿនសួនច្បាររង្វង់មូលចោមចៅបណ្តាលអោយក្រឡប់ផ្ងារជើងអូសជាង១០ម៉ែត្ររងការខូចខាត តែសំណងល្អមិនរងរបួសដល់មនុស្ស ។
ក្រោយពេលកើតហេតុតៃកុងរថយន្តបង្កបានលូនចេញពីរថយន្តហើយគេចខ្លួនបាត់ដោយបន្សល់ទុករថយន្តនៅកន្លែងកើតហេតុត្រូវបាន សមត្ថកិច្ចចុះមកដល់ចំណុចកើតហេតុនិងធ្វើវាស់វែងតែភ្លាមនោះក៏មានដំណាងរថយន្តមកធ្វើការសម្របសម្រួលព្រោះដោយសារតែមិនមានរបួសដល់មនុស្ស ៕
...
ដោយ៖ សុខាសែនជ័យ
