ខេត្តព្រះសីហនុ៖ នៅថ្ងៃទី១៥ ខែធ្នូ ឆ្នាំ២០១៩ វេលាម៉ោង២ និង០០នាទី រំលងអាធ្រាត្រ កម្លាំងជំនាញផែននគរបាលព្រហ្មទណ្ឌ បានចេញល្បាតតាមដងផ្លូវ ពេលដល់ចំណុចផ្លូវកាស៊ីណូ ជីយូវនីសិន ស្ថិតនៅភូមិ៣ សង្កាត់៣ ក្រុង-ខេត្តព្រះសីហនុ ក៏ប្រទះឃើញជនជាតិចិន០២នាក់ ជិះម៉ូតូ ០១គ្រឿង ម៉ាកស្មាស់ ពណ៌ក្រហម មានពាក់មួកបិទមុខជិត និងពាក់ម៉ាស់ គួរអោយសង្ស័យទើបឃាត់សួរនាំ និងធ្វើការឆែកឆេរ ក៏រកឃើញកាំភ្លើងខ្លី០១ដើម ព្រមទាំងសម្ភារៈវត្ថុតាងមួយចំនួនទៀត ទើបឃាត់ខ្លួនជនសង្ស័យទាំង០២នាក់ យកមកការិយាល័យនគរបាលព្រហ្មទណ្ឌកម្រិតស្រាល តែម្តង ។
សមត្ថកិច្ចបានអោយដឹងថា៖ ជនសង្ស័យទាំង០២នាក់ មានឈ្មោះដូចខាងក្រោម៖
១-ឈ្មោះ HE XIAOPING ភេទប្រុស អាយុ ៤៣ឆ្នាំ ជនជាតិចិន មុខរបរ មិនពិតប្រាកដ លិខិតឆ្លងដែនលេខ EH0851963 មានស្រុកកំណើត ក្រុង-ខេត្ត SICHUAN ប្រទេសចិន ស្នាក់នៅបច្ចុប្បន្ន ភូមិ៤ សង្កាត់៤ ក្រុង-ខេត្តព្រះសីហនុ ។
២-ឈ្មោះ SUN PENG ភេទប្រុស អាយុ ២៥ឆ្នាំ ជនជាតិចិន មុខរបរ មិនពិតប្រាកដ លិខិតឆ្លងដែនលេខ EC5907936 មានស្រុកកំណើត ក្រុង YUNNAN ខេត្ត ZHEJIANG ប្រទេសចិន ស្នាក់នៅបច្ចុប្បន្ន ភូមិ៤ សង្កាត់៤ ក្រុង-ខេត្តព្រះសីហនុ ។
សមត្ថកិច្ចបន្តថា៖ វត្ថុតាងចាប់យកបានរួមមាន៖
-កាំភ្លើងខ្លី ០១ដើម ម៉ាក K59 គ្មានលេខសំគាល់ (ឈុសលេខចោល)
-បង់កាំភ្លើង ០១
-គ្រាប់កាំភ្លើង ០៥គ្រាប់
-កាំបិតចុងស្រួច ០៣ដើម (យកក្រណាត់ក្រហមចងរុំ)
-មួកចំនួន ០២
-ម៉ាស់ ០៤
-លិខិតឆ្លងដែន ០២ក្បាល ។ ចំពោះករណីនេះ ការិយាល័យនគរបាលព្រហ្មទណ្ឌកម្រិតស្រាល កំពុងបន្តនីតិវិធី ធ្វើកំណត់ហេតុស្តាប់ចម្លើយ ដើម្បីសំយោគបទល្មើសបញ្ជូនទៅកាន់សាលាដំបូង៕

ដោយ៖ ឆ្លាម សមុទ្រ