ភ្នំពេញ ៖ ជនសង្ស័យមួយក្រុមប្រដាប់ដោយកាំភ្លេីងខ្លួនមួយដេីមជិះម៉ូតូមកស្ទាក់ធ្វេីសកម្មភាពភ្ជង់ប្លន់យកម៉ូតូពីស្ត្រីម្នាក់បានសម្រេចហេីយគេចខ្លួនបាត់ដោយសុវត្តិភាព ហើយបានបង្កការភ្ញាក់ផ្អេីល កាលពីវេលាម៉ោង៥និង៣០នាទីព្រឹកថ្ងៃទី២៥ ខែធ្នូ ឆ្នាំ២០១៩ នៅតាមផ្លូវលំ ខាងក្រោយវត្តតាំងកសាងខាងត្បូង ខាងលិចប៉ុស្តិ៍កាកាប២ ប្រមាណជា២០០ម៉ែត្រ ក្នុងភូមិព្រៃសាលា  សង្កាត់កាកាប២ ខណ្ឌពោធិសែនជ័យ ។

ស្ត្រីរងគ្រោះឈ្មោះ សៀក ផាត អាយុ៤២ឆ្នាំ មុខរបរមេផ្ទះ មានប្តី ឈ្មោះ យ៉ុន បេ អាយ៤៧ឆ្នាំ មុខរបរ លក់ទឹក​កក នៅសង្កាត់ក្រាំងធ្នង់ មានកូនស្រី២នាក់ រស់នៅក្នុងភូមិកើតហេតុខាងលើ ។ ម៉ូតូដែលចោរប្លន់យកទៅបាត់ ម៉ាកហុងដា សេ១២៥ ស៊េរី២០១៥ ពណ៌ខ្មៅ ពាក់ស្លាកលេខ ស្វាយរៀង 1G-7791 ( ជាម៉ូតូខ្ចីអ្នកជិតខាង) និងភ្ជង់ដោះយកខ្សែកប្លាទី ទម្ងន់៣,៥ជី ទូរស័ព្ទចុចពិលមួយគ្រឿង ។

តាមការរៀបរាប់ពីស្ត្រីរងគ្រោះ បានឲ្យដឹងថា មុនកើតហេតុ ប្តីរបស់គាត់ងើបក្រោកពីយប់ បានចាក់សោផ្ទះ ចំហៀងខាងបន្ទប់ដាក់ម៉ូតូ ហើយចេញទៅលក់ទឹកកកនៅឯខាងសង្កាត់ក្រាំងធ្នង់បាត់ លុះគាត់ និងកូនស្រីងើបភ្ញាក់ឡើង បន្ទាប់ទ្វារខាងដាក់ម៉ូតូជាប់សោ គាត់ក៏បាន ទៅខ្ចីម៉ូតូ ពីអ្នកជិតខាង ស្នាក់នៅទល់មុខផ្ទះ ឈ្មោះ សុខ សៃ ភេទប្រុស អាយុ៣៣ឆ្នាំ មុខរបរ ជាងសំណង់ មានស្រុកកំណើត ភូមិព្រែកទ័ព ឃុំព្រះស្តេច ស្រុកព្រះស្តេច ខេត្តព្រៃវែង ជិះទៅតាមយកកូនសោ ពីប្តី នៅកន្លែងលក់ទឹកកក លុះជិះវិលត្រឡប់មកផ្ទះវិញ ដល់ចំណុចកើតហេតុខាងលើ ស្រាប់តែលេចមុខជនសង្ស័យគ្នា៤នាក់ ជិះម៉ូតូសេ១២៥ ចំនួន២គ្រឿង តាម​មកស្ទាក់ ដកកាំភ្លើងភ្ជង់ប្លន់យកម៉ូតូ និងដោះយកដោះយកខ្សែក ទូរស័ព្ទដៃ ហើយគេចខ្លួន ទៅតាមផ្លវស្របផ្លូវដែក ឆ្ពោះទៅខាងលើតបាត់ស្រមោល ។

ក្រោយកើតហេតុ ជនរងគ្រោះ រួមជាមួយម្ចាស់ម៉ូតូ ទៅប្តឹងនគរបាលប៉ុស្តិ៍កាកាប២ ដើម្បីឲ្យជួយស្រាវជ្រាវតាមចាប់ខ្លួនចោរ ប្លន់ប្រដាប់អាវុធខាងលើ ៕សុខាសែនជ័យ​