ភ្នំពេញ៖ យុវតី ៣នាក់រងរបួសធ្ងន់និងស្រាលខណៈជិះម៉ូតូប៉ះគូថរថយន្តម៉ាក FUSO ១គ្រឿងដែលកំពុងបើកបរស្របគ្នា ហេតុការណ៍នេះកើតឡើងកាលពីវេលាម៉ោង ៨ព្រឹកថ្ងៃទី០៥ ខែមករា ឆ្នាំ២០១៦ នៅចំនុចមុខសាលាដុនម៉ូស្កូ ផ្លូវណតប្រ៊ីក ភូមិស្លែងរលើង សង្កាត់ទឹកថ្លា ខណ្ឌសែនសុខ ។

ប្រភពពីកន្លែងកើតហេតុបានអោយដឹងថា នៅមុខពេលកើតហេតុគេឃើញមានរថយន្ត FUSO ដឹកទំនិញក្បាលពណ៌លឿង មានបិទពាក្យ( ដឹកជញ្ជូនM70)  ពាក់ស្លាកលេខ ព្រះសីហនុ 3A-0904 បើកបរដោយបុរសម្នាក់ ក្នុងទិសដៅពីជើងទៅត្បូង លុះមកដល់ចំណុចកើតហេតុ រថយន្តនោះបានបង្អង់ល្បឿន ភ្លាមៗនោះមានយុវតី៣នាក់ ជិះម៉ូតូហុងដា Zoomer Xពាក់ស្លាកលេខ ភ្នំពេញ1FD-6689 ជិះមកពីក្រោយចាប់ហ្វ្រាំងមិនទាន់បានប៉ះគូទពីក្រោយនៃរថយន្ត ហើយដួលបណ្តាលអោយរបួសធ្ងន់២នាក់និងស្រាលម្នាក់តែម្តង ។

ក្រោយកើតហេតុគេឃើញមានមន្ត្រីយោធាពីអង្គភាព ង៧០ម្នាក់ បានមកជួយអន្តរាគមន៍ដោះរថយន្តយកទៅបាត់់ដោយមិនមានចេញសំណង ឬថ្លៃព្យាបាលអ្វីទាំងអស់។ ចំណែកខាងជនរងគ្រោះក៏មានការតវ៉ាអ្វីដែរព្រោះឃើញមានការអន្តរាគមន៍បែបនេះ មានទាំងរថយន្តស្លាកលេខ ខ.ម ។

ចំណែកនគរបាលចរាចរណ៍ខណ្ឌសែនសុខ ក៏មិនហ៊ានធ្វើអ្វីដែរ ហើយក៏អោយអ្នកបើកបររថយន្តបើកទៅបាត់។ ចំណែកខាងយុវតីរងគ្រោះវិញក៍នាំគ្នាទៅកាន់មន្ទីរពេទ្យដោយខ្លួនឯងដោយមិនហ៊ានទារសំណងអ្វីទេ ៕

ដោយ៖ តុង សីហា