ភ្នំពេញ៖ បុរសម្នាក់បើករថយន្ដកាមរីហាយព្រីធមួយគ្រឿងក្នុងល្បឿនលឿន ជ្រុលបុករបាំងថ្មរពុះចែកទ្រូងផ្លូវបណ្ដាលអោយរងការខូចខាតអស់ចំនួនពីរកង់ និងរថយន្ដដាច់កង់ខាងមុខផ្នែកខាងឆ្វេងបន្តដំណើរទៅមុខលែងរួច ។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង០៣និង១៥នាទីទៀបភ្លឺ ថ្ងៃទី០៦ ខែមករា ឆ្នាំ២០១៦ តាមបណ្ដោយផ្លូវ ២៧១ នៅចំណុចជិតធារគារ ANK ស្ថិតក្នុងសង្កាត់ទំនប់ទឹក ខណ្ឌចំកាមន រាជធានីភ្នំពេញ ។
ប្រភពពណ៍មាននៅកន្លែងកើតហេតុបានអោយដឹងថា នៅមុនពេលកើតហេតុ គេបានឃើញមានរថយន្ដមួយគ្រឿងម៉ាកកាមរីហាយព្រីធ ពណ៍ស ពាក់ស្លាក់លេខ ភ្នំពេញ 2Z-9998 ធ្វើដំណើរតាមបណ្ដោយផ្លូវលេខ២៧១ ទិសដៅពីត្បូងទៅជើងក្នុងល្បឿនលឿនលុះមកដល់ចំណុចកើតហេតុក៏ជ្រុលបុករបាំងថ្មរពុះចែកទ្រូងផ្លូវបណ្ដាលអោយរងការខូចខាតអស់ចំនួនពីរផ្ទាំង ចំណែករថយន្ដដាច់កង់ខាងមុខផ្នែកខាងឆ្វេងបន្តដំណើរទៅមុខលែងរួច ។
ក្រោយកើតហេតុម្ចាស់រថយន្ដបានរត់គេចខ្លួនបាត់ ក្រោយមកកម្លាំងសមត្ថកិច្ចបានចុះដល់កន្លែងកើតហេតុនិងបានទំនាក់ទំនងជាមួយជំនាញចុះធ្វើការវាស់វែងស្ទូចយកទៅរក្សាទុកនៅការិយាល័យចរាចរណ៍រាជធានីភ្នំពេញ ដើម្បីរង់ចាំដោះស្រាយតាមនិតិវិធី ៕
ដោយ៖ ភារ៉ា ដង្កោ
