ខេត្តពោធិ៍សាត់៖ បុរសម្នាក់បានរងរបួសយ៉ាងធ្ងន់ធ្ងរ ខណៈកំពុងបើកគោយន្តស្រាប់តែមានរថយន្តកាមរីបាឡែនមកបុកពីក្រោយពេញទំហឹង ប៉ុន្តែរថយន្តបង្កបានជ្រុលចង្កូតធ្លាក់ផ្លូវរួចនាំគ្នាគេចខ្លួនបាត់អស់ ។

ហេតុការណ៍គ្រោះថ្នាក់ចរាចរណ៍រថយន្តបុកគោយន្តខាងលើ បានកើតឡើងកាលពីវេលាម៉ោង៥ និង៥០នាទីព្រឹក ថ្ងៃទី៧ ខែមករា ឆ្នាំ២០១៦ នៅលើកំណាត់ផ្លូវជាតិលេខ៥ ត្រង់ចន្លោះបង្គោលគីឡូម៉ែត្រលេខ១៣៤.១៣៥ស្ថិតក្នុងភូមិក្បាលដំរី ឃុំអន្សាចំបក់ ស្រុកក្រគរ ខេត្តពោធិ៍សាត់ ។

លោកវរៈសេនីយ៍ត្រី ឯម រុន អធិការនគរបាលស្រុកក្រគរបានឱ្យដឹងថា បុរសរងរបួសជាអ្នកបើកគោយន្តត្រូវរថយន្តបុកឈ្មោះ ដា អាយុ ៣៥ឆ្នាំ រស់នៅភូមិ.ឃុំកើតហេតុ។ លោកអធិការបន្តថាចំណែករថយន្តបង្កម៉ាកតូយូតាកាមរីបាឡែន ពណ៌ទឹកប្រាក់ ពាក់ស្លាកលេខ កំពង់ចាម 2A-4301 ហើយបើតាមសាក្សីឃើញហេតុការណ៍និយាយថាគេឃើញរថយន្តបង្កនិងគោយន្តធ្វើដំណើរស្របទិសគ្នា (ពីលិចទៅកើត) លុះដល់ចំណុចកើតហេតុស្រាប់តែរថយន្តបុកគោយន្តពីក្រោយពេញទំហឹងបណ្ដាលឱ្យអ្នកបើកគោយន្តប៉ើងដូចក្រដាស់ ចំណែករថយន្តក៏បានរេចង្កូតធ្លាក់ពីលើផ្លូវរួចគេចខ្លួនបាត់អស់ ។

លោកអធិការបន្តទៀតថាវត្ថុតាងសមត្ថកិច្ចយកមករក្សាទុកនៅអធិការដ្ឋាននគរបាលស្រុកក្រគរ ដើម្បីរងចាំធ្វើការដោះស្រាយគ្នាតាមនីតិវិធី ៕

ដោយ៖ ប៉ឹម ពិន