ភ្នំពេញ៖ នារីម្នាក់បានធ្លាក់ពីលើអាគារសំណង់មួយកន្លែងខណៈពេលកំពុងធ្វើការសែងកំបោរទៅអោយជាងស្រាប់តែរអិលធ្លាក់ពីកំពស់ជាន់ទី៦។
ហេតុការណ៍នេះបានកើតឡើងកាលពីវេលាម៉ោង២ និង២០នាទីរសៀលថ្ងៃទី៧ ខែមករា ឆ្នាំ២០១៦ ស្ថិតនៅការដ្ឋានសំណង់មួយកន្លែងតាមបណ្តោយផ្លូវសហពន្ធ័រុស្សី ភូមិចុងថ្នល់ខាងលិច ក្នុងសង្កាត់ទឹកថ្លា ខណ្ឌសែនសុខ ។

តាមប្រភពព័ត៌មានពីបងប្អូននារីរងគ្រោះបានប្រាប់អោយដឹងថា នារីរងគ្រោះខាងលើឈ្មោះយន់ ស្រីស្រស់ អាយុ១៧ឆ្នាំ  ស្នាក់នៅកន្លែងការដ្ឋានសំណង់កើតហេតុខាងលើ មានស្រុកកំណើតនៅភូមិអង្គស ស្រុកមេសាង ខេត្តព្រៃវែង ។

ប្រភពព័ត៌មានបន្តបានប្រាប់អោយដឹងទៀតថា នៅមុនពេលកើតហេតុនារីរងគ្រោះបានឡើងទៅលើការដ្ឋានសំណង់ជាន់ទី៦លាយកំបោរយកទៅអោយជាងបៀករៀបឥដ្ឋលុះដល់វេលាកើតហេតុខាងលើនារីរងគ្រោះបានយកឈើមកសែងកំបោរជាមួយនារីម្នាក់ទៀត ខណៈពេលសែងមកដល់កន្លែងកើតហេតុស្រាប់តែរអិលផ្ងាកទៅក្រោយបណ្តាលអោយធ្លាក់ពីកំពស់ជាន់ទី៦មកដល់ដីត្រូវបានក្រុមការងារបញ្ជូនទៅសង្គ្រោះបន្ទាន់ភ្លាមៗនៅមន្ទីពេទ្យព្រះកុសមៈ ចំណែកនារីម្នាក់ទៀតដែលសែងជាមួយនារីរងគ្រោះបានស្រវ៉ាតោងចំរឹងបង្អួចជាប់មិនបណ្តាលអោយមានរបួសទេ ។

បច្ចុប្បន្ននារីរងគ្រោះកំពុងសង្គ្រោះបន្ទាន់នៅក្នុងមន្ទីរពេទ្យព្រះកុសមៈរហូតមកដល់ពេលនេះនារីរងគ្រោះមិនទាន់ដឹងខ្លួននៅឡើយទេ ៕

ដោយ៖ សីហា