ក្រុងប៉ោយប៉ែត៖ ម៉ូតូ២គ្រឿងបុកគ្នា ធ្វើឲ្យមនុស្សប្រុស ស្រី២នាក់ជាបុគ្គលិកកាស៊ីណូរងរបួសធ្ងន់ កាលពីម៉ោង៩ និង១០នាទីយប់ថ្ងៃទី០៧ ខែមករា ឆ្នាំ២០១៦តាមបណ្ដោយផ្លូវជាតិលេខ៥ ត្រង់ចំណុចទល់មុខហាងលក់ទូរសព្ទ័ដៃវ៉ុយសេង ឋិតក្នុងភូមិអូរជ្រៅ សង្កាត់ក្រុងប៉ោយប៉ែត ខេត្តបន្ទាយមានជ័យ ។

សមត្ថកិច្ចប្រាប់ថា ជនរងគ្រោះទី១មានឈ្មោះយួក មុំ ភេទស្រី អាយុ៣៨ឆ្នាំមុខរបបុគ្គលិកកាស៊ីណូព្រីនសេស ស្នាក់នៅភូមិកើតហេតុ និងទី២.មានឈ្មោះនៅ រី ភេទប្រុស អាយុ២៤ឆ្នាំមុខរបរបុគ្គលិកស៊ីណូ ស្នាក់នៅភូមិគីឡូម៉ែត្រលេខ៤ សង្កាត់ផ្សារកណ្ដាល ក្រុងប៉ោយប៉ែត ទាំង២នាក់រងរបួសធ្ងន់ ។

សមត្ថកិច្ចបន្តថា មុនកើតហេតុមានម៉ូតូឌុប១គ្រឿងមិនស្គាល់ម៉ាកបានដឹកឈ្មោះយួក មុំ ជាបុគ្គលិកកាស៊ីណូព្រីនសេសបានបើកបរចេញពីចិញ្ចើមផ្លូវខាងត្បូងផ្លូវជាតិឆ្លងកាត់ទទឹងទ្រូងផ្លូវសំដៅទៅទិសខាងជើងពេលឆ្លងជិតផុតគំនួសពាក់កណ្ដាលទ្រូងផ្លូវស្រាប់តែមានម៉ូតូ១គ្រឿងទៀតម៉ាកហុងដាទ្រីម សេ១២៥ ពណ៌ខ្មៅ ពាក់ស្លាកលេខបន្ទាយមានជ័យ1K-0713បើកបរដោយឈ្មោះនៅ រីក្នុងទិសដៅពីលិចទៅខាងកើតក្នុងល្បឿនយ៉ាងលឿនពេលដល់ចំណុចកើតហេតុស្រាប់តែបុកម៉ូតូកំពុងឆ្លងផ្លូវបណ្ដាលឲ្យរងគ្រោះតែម្ដង ។

ករណីគ្រោះថ្នាក់ខាងលើនេះគីបណ្ដាលមកពីអ្នកបើកបរម៉ូតូមិនស្គាល់ម៉ាកកាត់ទទឹងផ្លូវមិនគោរពសិទ្ធអាទិភាពមិនគោរពច្បាប់ចរាចរណ៍ផ្លូវគោកថ្មីមាត្រា២១ចំណុចទី០៩ជំពួក០៣ ហើយអ្នកបើកបរឈ្មោះនៅ រី បើកបរមានល្បឿនលឿនក្នុងទីប្រជុំជនបណ្ដាលឲ្យគ្រោះថ្នាក់ ។ ចំណែកអ្នកបើកបរមិនស្គាល់អត្តសញ្ញាណក្រោយហេតុការណ៍រត់គេចខ្លួន ។

ក្រោយកើតហេតុសមត្ថកិច្ចធ្វើការវាស់វែងរួចហៅរថយន្តដឹកឈ្មោះនៅ រីយកទៅសង្គ្រោះនៅមន្ទីរពេទ្យបង្អែកក្រុងប៉ោយព៉ែត ចំណែកឈ្មោះយួក មុំត្រូវបានសាច់ញ្ញាតដឹកទៅសង្គ្រោះនៅស្រុកអារញ្ញ ខេត្តស្រៈកែវ ប្រទេសថៃ ។ រីឯម៉ូតូម៉ាកហុងដាឌ្រីម ពាក់ស្លាកលេខបន្ទាយមានជ័យ1K-0713 ខូចខាតយ៉ាងធ្ងន់ត្រូវសមត្ថកិច្ចយកទៅរក្សាទុកនៅអធិការដ្ឋាននគរបាលក្រុងប៉ោយប៉ែត ៕

ដោយ៖ វណ្ណា