ខេត្ដកំពង់ធំ៖ សាកសពស្ដ្រីចំណាស់ ម្នាក់ត្រូវគេប្រទះឃើញអណ្ដែតក្នុងទឹក ស្រះខាងក្រោយអនុវិទ្យាល័យ៧មករា បង្កឱ្យមានការភ្ញាក់ផ្អើលកាលពីវេលា ម៉ោង៧ព្រឹកថ្ងៃទី៨ ខែមករា ឆ្នាំ២០១៦ ស្ថិតក្នុងភូមិត្រញំងទឹម ឃុំបឹងល្វា ស្រុក សន្ទុក ខេត្ដកំពង់ធំ។
សាកសពជនរងគ្រោះឈ្មោះ ម៉ៅ យីម ភេទស្រី អាយុ៧២ឆ្នាំ មានទីលំនៅ ក្នុងភូមិ-ឃុំកើតហេតុខាងលើ។
បើតាមសម្ដីកូនចៅរបស់ជនរងគ្រោះបានឱ្យដឹងថា លោកយាយវ័យចំណាស់ រូបនេះគាត់មានជំងឺសរសៃប្រសាទហើយចេះតែដើរម្ដងទៅលិចម្ដងទៅកើតជា រៀងរាល់ថ្ងៃ។ ដោយឡែកនៅយប់កើត ហេតុពួកគាត់បានបាត់លោកយាយហើយម្នាក់ៗបានខំដើររកដែរតែរកមិនឃើញ ស្រាប់តែព្រឹកឡើងមានគេប្រាប់ថាលោក យាយលង់ទឹកស្លាប់បាត់ទៅហើយ ។
ក្រោយកើតហេតុកម្លាំងនគរបាល មូលដ្ឋានបានចុះដល់កន្លែងកើតហេតុ និងបានធ្វើកោសល្យវិច័យហើយសន្និដ្ឋានថា សាកសពលោកយាយ ម៉ោ យីម ពិតជាលង់ទឹកមែនមិនមែនជាអំពើឃាតកម្មអ្វីទេ រួចហើយបានប្រគល់ឱ្យបងប្អូន កូនចៅយកទៅធ្វើបុណ្យតាមប្រពៃណី ៕
ដោយ៖ ប៊ុន រិទ្ធី
