ភ្នំពេញ៖ បុរសម្នាក់សង្ស័យបើករថយន្តងោកមួយភាំងជ្រុលទៅបុកគូទរថយន្តមួយគ្រឿងទៀត ដឹកសណ្តែងបណ្តុះពេញទំហឹងបណ្ដាលឲ្យសណ្ដែករាយប៉ាយពេញផ្លូវរថយន្តខ្ទេចទាំងសងខាងសំណាងល្អមិនបង្កឲ្យមានអ្នករងរបួស។

ហេតុការណ៍នេះកើតឡើងកាលពីវេលាម៉ោង ៣ទៀបភ្លឺថ្ងៃទី២ ខែមីនាឆ្នាំ ២០២០នៅចំណុចមុខផ្សារជម្ពូវ័ន តាមបណ្ដោយផ្លូវជាតិលេខ ៤ ក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានឲ្យដឹងថា៖ មុនកើតហេតុគេឃើញបុរសម្នាក់បើករថយន្តតូយ៉ូតាព្រូស១គ្រឿងពណ៌សពាក់ស្លាកលេខ ភ្នំពេញ2AK-7984ធ្វើដំណើរទិសដៅពីកើតទៅលិចលុះមកដល់ចំណុចកើតហេតុខាងលើសង្ស័យងោកមួយភាំងជ្រុលទៅបុករថយន្តហាយឡែនឌ័រដឹកសណ្ដែកបណ្ដុះមួយគ្រឿងពណ៌ទឹកប្រាក់ពាក់ស្លាកលេខភ្នំពេញ2AM-4900បើកបរដោយបុរសម្នាក់នៅខាងមុខពីក្រោយពេញទំហឹងបណ្តាលឲ្យជ្រុះសណ្តែករាយពេញផ្លូវ។ ចំណែករថយន្តខូចខាតផ្នែកខាងក្រោយយ៉ាងដំណំ។ រថយន្ត តូយ៉ូតាព្រូសខូចខាតផ្នែកខាងមុខយ៉ាងដំណំដូចគ្នា។

ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តទាំងពីរ គ្រឿងទៅរក្សាទុកនៅការិយាល័យនគរបាលចរាចរណ៍ផ្លូវគោករាជធានីភ្នំពេញរកចាំធ្វើការដោះស្រាយគ្នាទៅតាមផ្លូវច្បាប់៕

ដោយ៖ សុខាសែនជ័យ