ភ្នំពេញ៖ យុវជនម្នាក់រងរបួសធ្ងន់និងម្នាក់ទៀតរងរបួសស្រាលខណៈដែលជួបគ្រោះថ្នាក់ចរាចរណ៍រវាងម៉ូតូនិងម៉ូតូ កាលពីវេលាម៉ោង៤ និង៣០នាទីល្ងាចថ្ងៃទី០៨ ខែមករា ឆ្នាំ២០១៦ តាមបណ្តោយផ្លូវសម្តេចជាសុីម ក្នុងសង្កាត់ភ្នំពេញថ្មី ខណ្ឌសែនសុខ។

ជនរងគ្រោះទី១មានឈ្មោះ សាយ កុសល ភេទប្រុស អាយុ១៩ឆ្នាំមុខរបរសិស្សរងរបួសធ្ងន់ និងទី២មានឈ្មោះនី សុភ័ក្រ្តា ភេទប្រុស អាយុ១៩ឆ្នាំរងរបួសស្រាល អ្នកទាំងពីស្នាក់នៅសាលាវិចិត្តសិល្បះ។ ចំណែកភាគីខាងម៉ូតូលក់ទឹកអំពៅមានឈ្មោះ វ៉ាន់ ស ភេទប្រុស អាយុ១៦ឆ្នាំ ស្នាក់នៅភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ។

ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតគេឃើញមានម៉ូតូគុបជ្រុង១គ្រឿង ពណ៍ស្លែពាក់ស្លាកលេខភ្នំពេញ1F-6292 ដែលមានសណ្តោងធុងលក់ទឹកអំពៅផងបើកបរដោយឈ្មោះ វ៉ាន់ ស ក្នុងទិសដៅពីលិចទៅកើតលុះមកដល់ចំណុចមុខរោងចក្រអ្នកបើកបរក៏បត់ឆ្វេងគោលបំណងទៅលក់ទឹកអំពៅនៅមុខរោងចក្រពេលនោះក៏មានយុវជន២នាក់បានជិះម៉ូតូ១គ្រឿងម៉ាកស៊ុយសុីគីនិច ពណ៍សពាក់ស្លាកលេខភ្នំពេញ1DH-2914 បើកបរក្នុងទិសដៅពីកើតទៅលិចក្នុងល្បឿនលឿនហើយចាប់ហ្វ្រាំងមិនទាន់ក៏ជ្រុលទៅបុកនឹងម៉ូតូអ្នកលក់ទឹកអំពៅពេញទំហឹងបណ្តាលអោយយុវជនម្នាក់រងរបួសធ្ងន់ និងម្នាក់ទៀតរងរបួសស្រាលតែម្តង។

ក្រោយកើតហេតុជនរងគ្រោះត្រូវបានបញ្ជូនទៅមន្ទីរពេទ្យហើយក៏មាននគរបាលចរាចរណ៍ចុះមកដល់កន្លែងកើតហេតុធ្វើការសម្របសម្រួលហើយភាគីទាំងពីរក៏មិនមានការផ្តឹងផ្តល់អ្វីទេដោយព្រមព្យាបាលរបួស និងជុសជុលម៉ូតូរៀងៗខ្លួន៕

ដោយ៖ តុង សីហា