ខេត្តកណ្តាល៖ សមត្ថកិច្ចនគរបាលស្រុកស្អាងចេញល្បាតពេលយប់ចាប់បានមុខសញ្ញារក្សាទុកសារធាតុញៀនខុសច្បាប់ម្នាក់ កាលពីវេលាម៉ោង២១ និង៥០នាទី ថ្ងៃទី៨ ខែមករា ឆ្នាំ២០១៦ ស្ថិតក្នុងភូមិព្រែកថី ឃុំរកាខ្ពស់ ស្រុកស្អាង ដកហូតបានថ្នាំញៀនមួយកញ្ចប់និងម៉ូតូមួយគ្រឿងជិះធ្វើសកម្មភាព ដើម្បីកសាងសំណុំរឿងចាត់ការតាមច្បាប់ ។

មន្ត្រីនគរបាលស្រុកស្អាងបានឲ្យដឹងថា មុខសញ្ញាដែលត្រូវបានឃាត់ខ្លួននោះមានឈ្មោះ ឃឿន ង៉ុក ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅក្នុងភូមិពោធិ៍តាប៉ាង ឃុំស្វាយប្រទាល ស្រុកស្អាង ខេត្តកណ្តាល ។

ប្រភពដដែលបានបន្តថា នៅមុនពេលចាប់ខ្លួនមុខសញ្ញាខាងលើនេះសមត្ថកិច្ចនគរ​បាលស្រុកស្អាងបានចេញល្បាតក្នុងដែនរដ្ឋបាល ខណៈកំពុងល្បាតបានប្រទះឃើញមុខសញ្ញាជិះម៉ូតូម្នាក់ឯងយ៉ាងលឿនតាមបណ្តោយផ្លូវលេខ២១B ។ ភ្លាមៗនោះកម្លាំងល្បាតបានស្ទាក់ឲ្យឈប់សុំធ្វើការត្រួតពិនិត្យ រហូតឈានដល់រកឃើញមានវត្ថុតាងជាក់ស្តែងឃាត់ខ្លួនមុខសញ្ញារូបនេះ ដើម្បីកសាងសំណុំរឿងចាត់ការតាមច្បាប់ ។

នៅចំពោះមុខសមត្ថកិច្ចនគរបាលជនសង្ស័យបានសារភាពថា ថ្នាំញៀនមួយកញ្ចប់ខាងលើនេះរូបគេបានទិញពីមេក្លោងជួញដូរគ្រឿងញៀននៅម្តុំសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ក្នុងតម្លៃ២០០.០០០រៀល ៕

ដោយ៖ ស្អាងជ័យ