ខ្សែប្រយុទ្ធអន្តរជាតិអាហ្សង់ទីន Lionel Messi បានដាក់បង្ហាញពានរង្វាន់ចំនួន៥ក្រោយរូបគេទើបតែបានឈ្នះពានរង្វាន់កីឡាករបាល់ទាត់ឆ្នើមជាងគេលើពិភពលោកឆ្នាំ (Ballon d’Or) ឆ្នាំ២០១៥ ជាលើកទី៥ពីសហព័ន្ធបាល់ទាត់អន្ដរជាតិ(FIFA)នៅទីក្រុងស៊ូរិក ប្រទេសស្វ៊ីស កាលពីថ្ងៃទី១១ខែមករា។

កីឡាករវ័យ២៧ឆ្នាំរបស់ក្លិប Barcelona រូបនេះបានទទួលបានសំឡេងគាំទ្រ៤១ភាគរយ នាំមុខកីឡាករ Cristiano Ronaldo ខ្សែបម្រើក្លិបReal Madrid ដែលមានសំឡេងគាំទ្រ២៨ភាគរយ និង Neymar មិត្តរួមក្លិបដែលមានសំឡេងគាំទ្រប្រហែល៨ភាគរយតាមការរៀបចំដោយ FIFA ។

ចំណែកក្រុមហ៊ុនលក់សម្ភារកីឡាម៉ាក Adidas បានផ្តល់រង្វាន់ស្បែកជើងប្លាទីនដល់កីឡាករ Lionel Messi ដែលបានស៊ុតបាល់បញ្ចូលទីបានចំនួន៥២គ្រាប់កាលពីរដូវកាលមុនឲ្យក្រុម Barcelona និងក្រុមជម្រើសជាតិអាហ្សង់ទីន។

ក្រោយពេលទទួលបានជ័យជម្នះលើកទី៥កីឡាករ Messi បានថ្លែងថា “វាពិតជាពេលវេលាដ៏ពិសេសបំផុតសម្រាប់រូបខ្ញុំដែលបានវិលត្រឡប់មកកាន់ឆាកទទួលរង្វាន់នេះសាជាថ្មីដោយខ្ញុំបានអង្គុយមើលកីឡាករ Cristiano Ronaldo ឈ្នះពានរង្វាន់នេះចំនួន២ឆ្នាំជាប់ៗគ្នា ។ ឥឡូវខ្ញុំបានទទួលវាជាលើកទី៥ហើយដែលវាលើសពីអ្វីដែលខ្ញុំស្រមៃចង់បានកាលពីនៅក្មេងទៅទៀត ។ ឆ្លៀតពេលនេះខ្ញុំសូមថ្លែងអំណរគុណដល់មិត្តរួមក្រុមប្រសិនបើគ្មានពួកគេខ្ញុំមិនអាចគ្នាថ្ងៃនេះដែរ”។

ទោះបីជាកីឡាករ Lionel Messi ទទួលបានជោគជ័យខ្លាំងជាមួយនឹងក្លិប Barcelona ក៏ដោយក៏រូបគេពុំទាន់បានជួយក្រុមជម្រើសជាតិអាហ្សង់ទីឈ្នះពានរង្វាន់ពិភពលោកឬហៅថា World Cupឡើយ ៕ ដេវីត