ភ្នំពេញ៖ ជនសង្ស័យម្នាក់ក្នុងចំណោមបក្ខពួក២នាក់ត្រូវបានកម្លាំងកងរាជអាវុធហត្ថខណ្ឌដូនពេញ ឃាត់ខ្លួន បន្ទាប់ពីឆក់ទូរស័ព្ទជនបរទេសបានសម្រេច និងរត់គេចខ្លួនបាត់ម្នាក់ ។
កាលពីវេលាម៉ោង៩និង១៥នាទីយប់ ថ្ងៃទី១២ ខែមករា ឆ្នាំ២០១៥ នៅចំណុចផ្លូវលេខ១៩ កែងនឹងផ្លូវលេខ១៧២ ស្ថិតក្នុងសង្កាត់ជ័យជំនះ ខណ្ឌដូនពេញ ។
ប្រភពពត៌មានពីមន្ត្រីកងរាជអាវុធហត្ថបានឱ្យដឹងថា គឺមានជនសង្ស័យ២នាក់ជិះម៉ូតូហុងដាឌ្រីមសេ១២៥ ពណ៍ខ្មៅ ពាក់ស្លាកលេខ ភ្នំពេញ 1FL-4323 ជិះឌុបគ្នាពេលមកដល់ចំណុចកើតហេតុបានធ្វើសកម្មភាពឆក់ទូរស័ព្ទពីបុរសជនជាតិអ៊ីតាលីម្នាក់បានសម្រេច ។ ភ្លាមនោះកម្លាំងកងរាជអាវុធហត្ថដែលកំពុងជិះល្បាតបានឃើញ ក៏បានដេញតាមរហូតមកដល់ចំណុចខាងត្បូងនឹងផ្សារទំនើបសូរីយា ជនសង្ស័យបានផ្ទួលម៉ូតូហើយកម្លាំងកងរាជអាវុធហត្ថឃាត់ខ្លួនបានម្នាក់ជាអ្នកឌុប ចំណែកអ្នកដែលអង្គុយពីក្រោយធ្វើសកម្មភាពឆក់ យកទូរស័ព្ទគេចខ្លួនបាត់ ។
បន្ទាប់ពីឃាត់ខ្លួនបានជនសង្ស័យត្រូវបានកម្លាំងកងរាជអាវុធហត្ថខណ្ឌដូនពេញ នាំខ្លួនយកទៅសួរនាំ និងកសាងសំណុំរឿងនៅទីបញ្ជាការដ្ឋានកងរាជអាវុធហត្ថខណ្ឌ ដើម្បីចាត់ការទោតាមផ្លូវ ចំណែកជនរងគ្រោះជាជនជាតិបរទេស ក៏បានមកដាក់ពាក្យបណ្តឹងផងដែរ ៕
ដោយ៖ ព្រែកជ័យ
