ខេត្តពោធិ៍សាត់៖ រថយន្តតូរីស១២កៅអី ម៉ាកសាំយ៉ុងបោះពួយលឿនដូចហោះ បានបុកម៉ូតូពេញទំហឹងបណ្ដាលឲ្យមនុស្សក្មេង ចាស់ ប្រុស ស្រីចំនួន៣នាក់ រងរបួសយ៉ាងធ្ងន់ ។
ហេតុការណ៍គ្រោះថ្នាក់ចរាចរណ៍បណ្ដាលឲ្យរបួសរដូករណែលខាងលើបានកើតឡើងកាលពីព្រឹកថ្ងៃទី១២ ខែមករា ឆ្នាំ២០១៦ នៅលើកំណាត់ផ្លូវជាតិលេខ៥ ត្រង់ចន្លោះបង្គោលគីឡូម៉ែត្រលេខ១៦០.១៦១ ស្ថិតក្នុងភូមិវាលវង់ ឃុំស្នាអន្សា ស្រុកក្រគរ ខេត្តពោធិ៍សាត់ ។
ប្រភពពីសមត្ថកិច្ចបានឲ្យដឹងថា ជនរងរបួសយ៉ាងធ្ងន់ទាំង៣នាក់ខាងលើ ត្រូវបានគេស្គាល់ទី១-ឈ្មោះ ឡាច សុខចាន់ ភេទស្រី អាយុ១៨ឆ្នាំ ទី២-ឈ្មោះ ផាន ខេមម៉ា ភេទស្រី អាយុ៩ឆ្មាំ និងទី៣-ឈ្មោះឡាច ហង្សមាវ ភេទប្រុស អាយុ៧ឆ្នាំ អ្នកទាំង៣ រស់នៅភូមិ.ឃុំកើតហេតុ ហើយធ្វើដំណើររួមគ្នាដោយម៉ូតូ១គ្រឿង ម៉ាកស្មាស់រីវ៉ូ ពណ៍ក្រហម គ្មានស្លាកលេខ លុះមកដល់ចំណុចខាងលើ ស្រាប់តែមានរថយន្ដប្រភេទតូរីស១២កៅអី ម៉ាកសាំយ៉ុង ពណ៍ស ពាក់ស្លាកលេខ ភ្នំពេញ 2Z-1427 បើកមកពីក្រោយ ស្របទិសគ្នា បុកពេញទំហឹងរួចកិនពីលើតែម្ដង។
ប្រភពបន្តថា អ្នកបើកបរឈ្មោះ ភុម គីម ភេទប្រុសអាយុ៦០ឆ្នាំ រស់នៅភូមិប្រហាល ឃុំតាលោ ស្រុកបាកាន។ ប្រភពបន្តទៀតថា ភ្លាមៗនោះជនរងគ្រោះត្រូវបានគេបញ្ជូនទៅសង្គ្រោះនៅមន្ទីរពេទ្យ ចំណែកវត្ថុតាងម៉ូតូ និងរថយន្ដបង្ក សមត្ថកិច្ចយកទៅរក្សាទុកនៅអធិដ្ឋាននគរបាលស្រុកក្រគរ រង់ចាំដោះស្រាយគ្នាតាមនិតិវិធី ៕
ដោយ៖ ប៉ឹម ពិន
