ភ្នំពេញ៖ យុវជនម្នាក់បើករថយន្តកាមរីបាឡែន១គ្រឿងក្នុងល្បឿនយ៉ាងលឿនបានបួងចង្កូតបត់ឆ្វេងក៏ជ្រុលទៅបុកបង្គោលភ្លើង១ដើមនៅមុខហាងលក់វែនតាអុបទិច បណ្តាលឱ្យបង្គោលភ្លើងបាក់ទ្រេត ចំណែករថយន្តខ្ទេចមួយកំណាត់មុខធ្វើឱ្យរថយន្តបង្កទៅមុខលែងរួច។

ហេតុការណ៍នេះកើតនៅវេលាម៉ោង៤ និង៣០នាទីទាបភ្លឺ ថ្ងៃទី១៣ ខែមករា ឆ្នាំ២០១៦នៅចំណុចមុខហាងលក់វែនតាអុបទិច ស្ថិតនៅតាមបណ្តោយផ្លូវព្រះសីហនុកែងនិងផ្លូវលេខ៥១ ក្នុងសង្កាត់បឹងកេងកង១ ខណ្ឌចំកាមន រាជធានីភ្នំពេញ។

បើតាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញយុវជនម្នាក់បើករថយន្តមួយគ្រឿងម៉ាកកាមរីបាឡែន ពណ៌ស្ករ ពាក់ស្លាកលេខភ្នំពេញ 2Q-0838រួមមានក្មេងស្ទាវមួយក្រុមដែលនៅក្នុងរថយន្តសង្ស័យស្រវឹងស្រាទៀតបានបើកក្នុងល្បឿនយ៉ាងលឿនបានធ្វើដំណើរតាមបណ្តោយផ្លូវ ព្រះសីហនុក្នុងទិសដៅពីកើតទៅលិចខណៈមកដល់ចំណុចកើតហេតុកែងនិងផ្លូវលេខ៥១រួចយុវជនដែលជាអ្នកបើករថយន្តបានបួងចង្កូតបត់ឆ្វេងក៏ជ្រុលចង្កូតទៅបុកបង្គោលភ្លើង១ដើមយ៉ាងពេញទំហឹងបណ្តាលឱ្យបង្គោលភ្លើងបាក់ទ្រេត ចំណែករថយន្តបង្កខ្ទេចមួយកំណាត់មុខហើយរថយន្តទៅមុខលែងរួច។ បន្ទាប់មកក្រុមក្មេងស្ទាវដែលក្នុងរថយន្តនោះក៏បានបើកទ្វាររថយន្តរត់ទៅកាច់ស្លាកលេខរថយន្តដើម្បីមិនចង់អោយគេថតបានតែកាច់បានតែខាងមុខចំណែកខាងក្រោយកាច់មិនបានពួកក្រុមក្មេងស្ទាវនោះក៏បាននាំគ្នារត់គេចខ្លួនបាត់ស្រមោលតែម្តង ។

ក្រោយពេលកើតហេតុសមត្ថកិច្ចជំនាញចរាចរណ៍បានធ្វើការវាស់វែង និងស្ទូចយករថយន្តបង្កនោះទៅការរិយាល័យចរាចរណ៍ជើងគោកនៃស្នងការដ្ឋាននគរបាលរាជធានីភ្នំពេញ ដើម្បីរងចាំការដោះស្រាយ៕

ដោយ៖ ស រស្មី