ខេត្តកំពង់ស្ពឺ៖ នគរបាលស្រុកឧដុង្គបានធ្វើការបង្រ្កាប មុខសញ្ញាជួញដូរគ្រឿងញៀនយ៉ាងសកម្មម្នាក់ ខណៈពេលធ្វើសកម្មភាពដឹកជញ្ជូនថ្នាំញៀនបម្រុងយកទៅចែកចាយបន្តនៅស្រុកឧដុង្គ។
ការឃាត់ខ្លួននេះធ្វើឡើងកាលពីវេលាម៉ោង១រសៀល ថ្ងៃទី១៣ ខែមករា ឆ្នាំ២០១៦ នៅលើផ្លូវលេខ៤៤ ស្ថិតក្នុងភូមិឈូកស ឃុំព្រះស្រែ ស្រុកឧដុង្គ ខេត្តកំពង់ស្ពឺ ។ ជនសង្ស័យដែលត្រូវឃាត់ខ្លួនឈ្មោះ គឿង សុភ័ណ្ឌ ភេទប្រុស អាយុ៣១ឆ្នាំ រស់នៅភូមិស្រះកែវ ឃុំវាំងចាស់ ស្រុកឧដុង្គ។
លោកវរសេនីយ៍ត្រីពីងពៅអធិការរងនគរបាលស្រុកឧដុង្គបានឲ្យដឹងថា ដោយទទួលព័ត៌មានថាមានជនសង្ស័យម្នាក់កំពុងតែដឹកជញ្ជូនថ្នាំញៀនមកលក់និងចែកចាយបន្តនៅភូមិសាស្រ្តស្រុកឧដុង្គពេលនោះរូបលោកបានសុំយោបល់ពីលោកអធិការដើម្បីដឹកនាំកម្លាំងចុះបង្ក្រាបមុខសញ្ញាខាងលើ។ លោកអធិការរងបន្តថា ក្នុងប្រតិបត្តិការបង្ក្រាបនេះសមត្ថកិច្ចរបស់លោកដកហូតបានថ្នាំញៀន១កញ្ចប់ធំ, ទូរស័ព្ទដៃ១គ្រឿង និងម៉ូតូ១គ្រឿង ។
លោកអធិការរងបន្តថា ក្រោយពេលឃាត់ខ្លួនជនសង្ស័យត្រូវបានបញ្ជូនទៅឣធិការដ្ឋាននគរបាលស្រុកដើម្បីកសាងសំណុំរឿងបញ្ជូនបន្តទៅការិយាល័យជំនាញចាត់ការបន្តតាមច្បាប់ ៕
ដោយ៖ សេនាស័ក្តិ
