ខេត្តកោះកុង ៖ បុរសខ្មែរម្នាក់ត្រូវបានអាជ្ញាធរថៃខេត្តត្រាត ឆ្លើយប្រាប់មកភាគីកម្ពុជានាថ្ងៃ១៦ខែមេសានេះថា បុរសដែលរត់ពីដីថៃទាំងដៃជាប់ខ្នោះគឺមិនមានជាប់ពាក់ព័ន្ធបទល្មើសព្រហ្មទណ្ឌណាមួយនោះទេ ប៉ុន្តែគាត់មានបញ្ហារឿងគ្មានឯកសារស្នាក់នៅ និងលិខិតឆ្លងដែនត្រឹមត្រូវ ទើបភាគីថៃចាប់ខ្លួន។
លោកវរសេនីយ៍ត្រី ម៉ម ភឿង អធិការរងស្រុកបុទុមសាគរ បានឲ្យដឹងថា បុរសនេះឈ្មោះរស់ រឿន អាយុ៣៤ឆ្នាំ ជាជនជាតិខ្មែរ មានស្រុកកំណើតនៅភូមិ ឃុំ ស្រុក តាំងគោក ខេត្តកំពង់ធំ បានរត់ចេញពីខេត្តត្រាតប្រទេសថៃមកដល់ខេត្តកោះកុងជាខេត្តមានព្រំប្រទល់ជាប់គ្នាក្នុងថ្ងៃទី១៦ខែមេសានេះ។បច្ចុប្បន្ន បុរសរូបនេះកំពុងសម្រាកនៅដាច់ដោយឡែករយៈ១៤ថ្ងៃសិន ដើម្បីតាមដានពីសុខភាពខ្លាចមានពាក់ព័ន្ធជាមួយជំងឺកូវីដ-19 ។
បើតាមបុរសឈ្មោះរស់ រឿនខាងលើបានរៀបរាប់ប្រាប់សមត្ថកិច្ចថាគាត់ចូលទៅកាន់ទឹកដីថៃ តាមច្រកឡែមខេត្តបាត់ដំបង ក្នុងគោលបំណងចូលទៅស៊ីឈ្នួលនេសាទត្រី លើដែនសមុទ្រថៃ ក្នុងខេត្តត្រាត ដែលមានព្រំប្រទល់ជាប់ជាមួយនឹងខេត្តកោះកុង ។ នៅក្នុងអំឡុងពេលដែលខ្លួនបានចុះទៅធ្វើការនេសាទត្រីរយៈពេល១ខែ ខ្លួនក៏មានបញ្ហាឈ្លោះទាស់ទែងគ្នារវាងកម្មករខ្មែរនិងកម្មករខ្មែរដូចគ្នានៅលើទូកនេសាទ ហើយក៏ត្រូវបានថៅកែទូកនេសាទ បណ្ដេញចេញឲ្យឡើងមកលើគោកវិញ ។
គាត់រៀបរាប់ទៀតថាក្រោយថៅកែទូកបណ្តេញចេញគាត់គ្មានគោលដៅពិតប្រាកដនិងពុំមានលិខិតឆ្លងដែនត្រឹមត្រូវតាមច្បាប់អន្តោប្រវេសន៍នោះទេ ។ នៅក្នុងការធ្វើដំណើរតាមដងផ្លូវជាតិក្នុងទឹកដីថៃ ត្រូវបានតម្រួតថៃចាប់ឃាត់សួរនាំ ដើម្បីរកលិខិតឆ្លងដែន តែគាត់ប្រាប់សមត្ថកិច្ចថៃថា គាត់ចូលមកទឹកដីថៃនេះ ដោយមានថៅកែថៃជាអ្នកយកមកធ្វើការនេសាទត្រីនៅខេត្តត្រាត ដោយពុំមានលិខិតស្នាមអ្វីទាំងអស់ ។ពេលនោះតម្រួតថៃ ធ្វើការចាប់ឃាត់ខ្លួនគាត់ដាក់ខ្នោះដៃតែម្តង។
បុរសឈ្មោះ រស់ រឿន បានបន្តទៀតថា នៅក្នុងពេលដែលតម្រួតថៃដឹកខ្លួនតាមរថយន្តមកដល់ពាក់កណ្ដាលផ្លូវ ហើយតម្រួតថៃក៏ចុះបត់ជើងតូច ដោយឃើញឱកាសល្អ គាត់សម្រេចចិត្តលោតចុះពីលើរថយន្តរត់កាត់ព្រៃ ទាំងដៃជាប់ខ្នោះដើម្បីឲ្យរួចខ្លួនពីការចាប់ដាក់ពន្ធនាគារនៅក្នុងទឹកដីថៃ ។ នៅក្នុងការរត់គេចខ្លួននោះ ដែរគាត់បានហែលទឹកសមុទ្រចំនួន៧ថ្ងៃ ដោយមានប៊ីដុងទឹកមួយគ្រាន់នឹងបណ្ដែតខ្លួន តាមរលកហើយក៏គ្មានអាហារសម្រាប់ទទួលទាននៅក្នុងពេលហែលទឹកនោះដែរ ។ លុះហែលទឹកមកដល់ចំណុចកោះឆាង ក្នុងទឹកដីខេត្តត្រាត ព្រំដែនកម្ពុជា-ថៃ ខ្លួនក៏បានឡើងលើគោកឆ្លងចូលមកដីកម្ពុជា តាមព្រៃរត់មកឲ្យអាជ្ញាធរខណ្ឌស្រុកមណ្ឌលសីមា និងសមត្ថកិច្ចនគរបាលស្រុកមណ្ឌលសីមាជួយតែម្តង ។
ក្នុងករណីនេះដែរលោកប្រាក់ វិចិត្រ អភិបាលស្រុកមណ្ឌលសីមា ក៏បានឲ្យដឹងថា ក្រោយពីបានទទួលការស្នើសុំឲ្យជួយពីសំណាក់ពលករ ដែលរត់ឆ្លងដែនពីទឹកដីថៃចូលមកកម្ពុជាវិញនោះ លោកក៏បានសហការជាមួយនឹងកងកម្លាំងសមត្ថកិច្ចនគរបាលស្រុកមណ្ឌលសីមា ហើយក៏បានកាត់ខ្នោះដៃចេញព្រមទាំងនាំខ្លួនបុរសរងគ្រោះខាងលើទៅរក្សាទុកនៅស្នងការដ្ឋាននគរបាលខេត្តកោះកុង ដើម្បីរង់ចាំការពិនិត្យនិងសាកសួររឿងជាបន្តទៀតមុននឹងបញ្ជូនវិលត្រឡប់ទៅស្រុកកំណើតវិញ៕
ដោយ៖ ប្រាថ្នា
