ឥណ្ឌូនេស៊ី ៖ អ្នកនយោបាយឥណ្ឌូនេស៊ីម្នាក់បានបំភ័យអ្នករំលោភច្បាប់ក្នុងការប្រឆាំងវីរុសកូវីដ-19 ដើម្បីជាការទប់ទល់នឹងការបំពានមិនព្រមផ្ដាច់ខ្លួនឲ្យនៅដាច់ដោយឡែកពីគេដោយសុំឲ្យបង្ខាំងពួកគេនៅក្នុងផ្ទះខ្មោចលង ។
លោកស្រី Kusdinar Untung Yuni Sukowati ប្រធានតំបន់ Sragen និយាយថា លោកស្រីបានចេញបទបញ្ជាប្លែកពីគេមួយនៅសប្តាហ៍នេះដើម្បីដោះស្រាយជាមួយការហូរចូលនៃពលរដ្ឋមកតំបន់នេះ បន្ទាប់ពីរដ្ឋធានីហ្សាហ្កាតា និងទីក្រុងធំៗដទៃទៀតត្រូវបានបិទ ។ លោកស្រីមើលឃើញថាអ្នកចំណូលថ្មីមួយចំនួនមិនគោរពបទបញ្ជាដែលតម្រូវឲ្យពួកគេផ្ដាច់ខ្លួនរយៈពេល ១៤ ថ្ងៃដើម្បីការពារការរីករាលដាលនៃវីរុសកូវីដ-19នៅទូទាំងតំបន់របស់កោះ Java ឡើយ ។
ទង្វើនេះធ្វើឲ្យលោកស្រីបារម្ភនិងបានណែនាំដល់សហគមន៍ឲ្យរៀបចំផ្ទះដែលត្រូវគេបោះបង់ចោលដែលគេជឿថាមានខ្មោចលងតាមជំនឿពីមុនៗនៅក្នុងរឿងព្រេងឥណ្ឌូនេស៊ី ត្រៀមដាក់អ្នចចែស។រហូតមកដល់ពេលនេះមានមនុស្ស ៥ នាក់ហើយត្រូវបានគេយកទៅដាក់ក្នុងគុករបស់តំបន់ Sragen ។
នៅពេលសួរអំពីច្បាប់នេះលោកស្រី Sukowati បានប្រាប់ AFP កាលពីថ្ងៃអង្គារថា “ប្រសិនបើមានផ្ទះទទេ និងផ្ទះខ្មោចលងនៅក្នុងភូមិសូមដាក់មនុស្សនៅទីនោះ ហើយបង្ខាំងពួកគេ” ។ មន្ត្រីនៅក្នុងភូមិ Sepat បានជ្រើសរើសយកផ្ទះដែលត្រូវបានគេបោះបង់ចោលជាយូរមកហើយមួយនេះ ហើយបានដាក់គ្រែនៅឆ្ងាយពីគ្នាជាមួយនឹងការបាំងវាំងននផងដែរ ។
រហូតមកដល់ពេលនេះភូមិនេះបានបង្ខាំងអ្នកស្រុកដែលទើបមកដល់ចំនួន ៣ នាក់ជាមួយនឹងការដាក់នៅដាច់ដោយឡែករយៈពេលពីរសប្តាហ៍នៅក្នុងផ្ទះខ្មោចដ៏គួរឲ្យខ្លាចមួយនេះ តែគេមិនដឹងថា វិធានការណ៍បែបនេះជោគជ័យដែរឬយ៉ាងណាទេ ៕
ដោយ៖ ប្រាថ្នា
