ខេត្ដសៀមរាប៖ ទូរស័ព្ទដៃទំនើបៗរួមមានIPhone 6s និង IPhone 6s Plus ត្រូវបានសមត្ថកិច្ចគយនៅព្រលានយន្ដហោះអន្ដរជាតិនៅខេត្ដសៀមរាបធ្វើការរឹបអូស ខណៈក្រុមឈ្មួញនាំចូលពីប្រទេសសឹង្ហបុរី និងហុងកុង ដោយខុសច្បាប់។
ប្រតិបត្ដិការនេះធ្វើឡើងកាលពីថ្ងៃទី១៤ ខែមករា នៅព្រលានយន្ដហោះអន្ដរជាតិខេត្ដសៀមរាប ។
លោកគង់ផល្លាគុណ មន្ដ្រីគយនៅព្រលានយន្ដហោះអន្ដរជាតិ បានឲ្យដឹងថា ទូរស័ព្ទចំនួន៤៩៧គ្រឿងត្រូវបាននាំចូលដោយឈ្មួញឈ្មោះភិន រស្មី ចំនួន៧វ៉ាលី និងឈ្មោះង៉ូយ ធៀងហុងចំនួន៤វ៉ាលី ដែលសរុបចំនួនជិត៥០០គ្រឿង។
តាមប្រភពមន្ត្រីដដែលបានបន្តថា ការរឹបអូសយកទូរស័ព្ទដៃទាំងនេះ ស្របពេលដែលឈ្មួញទាំងពីនាក់លួចនាំចូលពីប្រទេសហុងកុង និងសិង្ហបុរី ចូលមកកម្ពុជាតាមច្រកទ្វារអន្តរជាតិ សៀមរាប ដោយមិនបានរាយការណ៍ដល់មន្ត្រីគយនិងរដ្ឋាករ ដែលប្រចាំការនៅការិយាល័យត្រួតពិនិត្យគយអាកាសយានដ្ឋានអន្តរជាតិ ខេត្តសៀមរាបនោះឡើយ ។
ទូរស័ព្ទទាំង៤៩៧គ្រឿងខាងលើ ត្រូវបានសមត្ថកិច្ចយកទៅរក្សាទុកនៅស្នាក់ការគយព្រលានយន្តហោះ ខេត្ត ដើម្បីរង់ចាំបន្តនីតិវិធី ដោយមានបិទត្រាគយនិងមានស្នាមមេដៃរបស់ម្ចាស់ទំនិញទាំង២នាក់យ៉ាង ត្រឹមត្រូវផងដែរ ៕
ដោយ៖ ជានិរន្ដរ៍
