ខេត្តកំពង់ធំ៖ ស្ត្រី២នាក់បានស្លាប់ភ្លាមៗនៅក្នុងហេតុការណ៍គ្រោះថ្នាក់ចរាចរណ៍មួយបង្កឡើងដោយរថយន្ដបែនធុងធំបើកមកបុកចំពីមុខម៉ូតូ១គ្រឿងកំពុងជិះឌុបគ្នា២នាក់ពេញទំហឹង បណ្ដាលអោយស្លាប់ភ្លាមៗនៅនិងកន្លែងកើតហេតុ ។
ហេតុការណ៍ដ៏រន្ធត់នេះបានកើតឡើងកាលពីវេលាម៉ោង១០ និង៣០នាទីព្រឹកថ្ងៃទី១៦ ខែមករា ឆ្នាំ២០១៦ត្រង់ចំណុចផ្លូវអេស៊ាន ផ្លូវវាងក្រុងក្នុងភូមិបាល្ល័ង្កលិច សង្កាត់ដំរីជាន់ខ្លា ខេត្តកំពង់ធំ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញម៉ូតូ១គ្រឿងជិះគ្នា២នាក់ក្នុងល្បឿនលឿន ក្នុងទិសដៅបញ្ច្រាសទិសគ្នាពីជើងទៅត្បូង មកដល់ចំណុចកើតហេតុក៏ប្រលះជាមួយរថយន្ដបែនធុនធំ ក្នុងល្បឿនលឿនដូចគ្នាពេញទំហឹង បណ្ដាលអោយមនុស្ស២នាក់ដែលកំពុងឌុបគ្នាស្លាប់ភ្លាមនៅនិងកន្លែងកើតហេតុ ដោយអ្នកស្លាប់មានឈ្មោះ សាន រតនា ភេទស្រី អាយុ៣៤ឆ្នាំ និងម្នាក់ទៀតត្រូវជាម្ដាយ ឈ្មោះ ម៉ិល ឡុង អាយុ៥៩ឆ្នាំ ទាំង២នាក់រស់នៅភូមិ ស្នែងក្របី ឃុំកំពង់ក្របៅ ខេត្តកំពង់ធំ ។
បន្ទាប់ពីកើតហេតុសមត្ថកិច្ចបានចុះមកធ្វើការវាស់វែងរួចបញ្ចូនសាកសពជនរងគ្រោះអោយក្រុមគ្រួសារ យកទៅធ្វើបុណ្យតាមប្រពៃណី ចំណែកម៉ូតូនិងរថយន្ដត្រូវបានបញ្ចូនរក្សាទុកនៅស្នងការខេត្តកំពង់ធំ រងចាំម្ចាស់ចូលខ្លួនមកដោះស្រាយតាមច្បាប់ ៕
ដោយ៖ ប៊ុន រិទ្ធី
