ភ្នំពេញ ៖ ប្រជាពលរដ្ឋប្រទះឃើញសពទារិកាម្នាក់ បានស្លាប់នៅក្នុងបន្ទប់ទឹក បន្ទាប់ពីស្ត្រីជាម្តាយបង្កើត បានយកមកប្លុងចោល រួចគេចបាត់ស្រមោល ។
ហេតុការណ៍ខាងលើនេះ បានបង្កការភ្ញាក់ផ្អើលកាលពីវេលាម៉ោង១រសៀល ថ្ងៃទី៩ ខែឧសភា ឆ្នាំ២០២០ ស្ថិតនៅភូមិឬស្សីទី១ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ ។
យោងតាមសម្ដីស្ត្រីម្នាក់សុំមិនបញ្ចេញឈ្មោះ ដែលរស់នៅកន្លែងកើតហេតុ បានប្រាប់ឲ្យដឹងថា នៅថ្ងៃកើតហេតុ គឺកូនប្រុសរបស់គាត់ បានដើរចូលបន្ទប់ទឹកត្រង់ទីតាំងខាងលើ ស្រាប់តែឃើញទារិកា ត្រូវបានគេដាក់នៅលើក្រណាត់ពណ៍ខ្មៅទុកចោល ។ ភ្លាមនោះកូនគាត់ក៏រត់ទៅប្រាប់ទើបគាត់នាំគ្នាដេីរទៅមេីលជាក់ស្ដែង ឃើញទារិកាខាងលើនេះពុំមានដង្ហើមនោះឡើយ គឺបានស្លាប់បាត់ទៅហើយ ទើបរាយការណ៍ប្រាប់សមត្ថកិច្ចមូលដ្ឋានឲ្យចុះមកពិនិត្យតែម្តង ។
ក្រោយទទួលបានព័ត៌មានភ្លាមៗ សមត្ថកិច្ចមូលដ្ឋានបានចុះទៅដល់ ហើយទាក់ទងទៅមន្រ្តីជំនាញខាងកោសល្យវិច្ឆ័យ ខណ្ឌមានជ័យ និងនគរបាលជំនាញកោសល្យវិច្ឆ័យ នៃស្នងការដ្ឋានរាជធានីភ្នំពេញ ចុះធ្វេីការពិនិត្យជាក់ស្តែង រួចបានបញ្ជាក់ថា ទារិកាខាងលេីនេះ ពិតជាស្លាប់ដោយអត់អាហារ ខណៈម្ដាយទុកចោលរាប់ម៉ោង ។
បច្ចុប្បន្ន សពទារិកាខាងលើ ត្រូវបានអាជ្ញាធរមានសមត្ថកិច្ច រៀបចំចាត់ចែងបូជាតាមប្រពៃណី ៕ដោយ៖ ភារ៉ា ដង្កោ
