ខេត្តកំពង់ធំ៖ មានហេតុការណ៍គ្រោះថ្នាក់ចរាចរណ៍មួយកាលពីវេលាម៉ោង៩ និង២០នាទីព្រឹក នៅថ្ងៃទី១៧ ខែមករា ឆ្នាំ២០១៦បានកើតឡើង នៅចំនុចភូមិអូគ្រូកែ ឃុំសំបូរ ស្រុកប្រាសាទសំបូរ ខេត្តកំពង់ធំ រវាងម៉ូតូម៉ាកស្តុបពី ពណ៌ឈាមជ្រូក លាយខ្មៅគ្មានស្លាកលេខ បុកជាមួយរថយន្ត Camry បណ្តាលឲ្យអ្នកបើកម៉ូតូស្លាប់ ពេលកំពុងដឹកយកទៅសង្គ្រោះនៅមន្ទីរពេទ្យ។

តាមប្រភពព័ត៌មានពីសមត្ថកិច្ចនគរបាល បានឲ្យដឹងថា អ្នកបើកម៉ូតូឈ្មោះ ម៉ៅ សុភ័ក្រ អាយុ១៨ឆ្នាំរស់នៅភូមិសំបូរ ឃុំសំបូរ ស្រុកប្រាសាទសំបូរ ចំណែកអ្នកបើកបររថយន្ដឈ្មោះម៉ៅសុវណ្ណារិទ្ ធអាយុ២៧ឆ្នាំរស់នៅក្នុងភូមិជាមួយ មុនពេលកើតហេតុ ជនរងគ្រោះបានបើកបរម៉ូតូក្នុងល្បឿនលឿនមិនប្រកាន់ស្ដាំលុះមកដល់ចំណុចផ្លូវកោងភូមិខាងលើបានបុករថយន្ដម៉ាកToyotaCamryស៊េរី1999 ពណ៌ទឹកមាសពាកស្លាកលេខភ្នំពេញ2H-2529បណ្តាលឲ្យអ្នកជិះម៉ូតូដួលរងរបួសធ្ងន់រួចក្រោយមកក៏បានបញ្ចូនអ្នករងគ្រោះទៅសង្គ្រោះនៅម្ទីរពេទ្យខេត្តកំពង់ធំតែដោយស្ថានភាពធ្ងន់ធ្ងរក៏បញ្ចូនបន្ដទៅមន្ទីរពេទ្យក្រុងភ្នំពេញតែអកុសលជនរងគ្រោះបានដាច់ខ្យល់ស្លាប់នៅតាមផ្លូវពេលដឹកយកទៅដល់ស្រុកបារាយណ៍។

ចំណែកឯវត្ថុតាងរថយន្តនិងម៉ូតូសមត្ថកិច្ចនគរបាលបានយកមករក្សាទុកនៅអធិការដ្នានគរបាលស្រុកប្រាសាទសំបូរ រងចាំភាគីសងខាងដោះស្រាយគ្នាតាមច្បាប់ ចំណែកសាកសពត្រូវបានសាច់ញាតិចាត់ចែងធ្វើបុណ្យតាមប្រពៃណី​៕

ដោយ៖ ប៊ុន រិទ្ធី