ខេត្តកំពង់ឆ្នាំង៖ គ្រោះថ្នាក់ចរាចរណ៍មួយដែលបង្កឡើងរវាងរថយន្តកុងតឺន័រ និងរថយន្តសាំយ៉ុង បណ្តាលអោយមនុស៣នាក់រងរបួសធ្ងន់និងស្រាល  ហេតុការណ៍នេះបានកើតឡើងកាលពីនៅវេលាម៉ោង៣ និង២០នាទីល្ងាចថ្ងៃទី១៧ ខែមករា ឆ្នាំ២០១៦ នៅលើកំណាត់ផ្លូវជាតិលេខ៥ ក្នុងចន្លោះគីឡូម៉ែត្រ ៥៧លេខ៥៨ ស្ថិតក្នុង ភូមិព្រៃពីស ឃុំជ្រេស ស្រុកកំពង់ត្រឡាច។

សមត្ថកិច្ចនគរបាលមូលដ្ឋានបានអោយដឹងថា នៅមុនពេលកើតហេតុរថយន្តម៉ាកសាំយ៉ុងជាប្រភេទរថយន្តទេសចរណ៍ ពាក់ស្លាកលេខ កំពង់ចាម 2A.1725 ពណ៌បៃតងចាស់ បើកបរ ក្នុងល្បឿនលឿនតាមផ្លូវជាតិពីជើងទៅត្បូង នៅពេលដល់កន្លែងកើតហេតុ បានបើកជែងវ៉ារថយន្តពីមុខ ប៉ុន្តែវ៉ាមិនផុត ក៏ជ្រុលទៅបុករថយន្ត ដឹកកុងតឺន័រមកពីមុខមួយគ្រឿង ពាក់ស្លាកលេខ ភ្នំពេញ 3B.3943 ដែលកំពុងធ្វើដំណើរច្រាស់ទិសគ្នា បើកបរដោយបុរសឈ្មោះ សៅ គឹមសាន អាយុ៣៦ឆ្នាំ មានទីលំនៅ ភូមិប៉េសេ សង្កាត់ទឹកថ្លា ខណ្ឌសែនសុខ រាជធានីភ្នំពេញ បណ្តាលអោយរថយន្តសាំយ៉ុងខ្ទាតទៅធ្លាក់ប្រឡាយ និង រងរបួសអ្នកជិះនៅក្នុងរថយន្តសាំយ៉ុងចំនួន៣នាក់តែម្តង ហើយបានដឹកយកទៅសង្រ្គោះនៅមន្ទីរពេទ្យបង្អែកស្រុកកំពង់ត្រឡាច ។

ក្រោយពេលកើតហេតុអ្នកបើកបររថយន្តទាំង២នាក់បានរត់គេចខ្លួន ។ ចំពោះមធ្យោបាយបង្កត្រូវបានយកទៅរក្សាទុកនៅអធិការដ្ឋាននគរបាលស្រុកកំពង់ត្រឡាច ដើម្បីរង់ចាំដោះស្រាយតាមនីតិវិធី ៕

ដោយ៖ ចន្ថា