ខេត្តបាត់ដំបង៖ ឳពុកម្តាយនិងកូនចំនួន៣នាក់ត្រូវរថយន្តកូរ៉ូឡាចង្កូតស្តាំបើកបុកចំពីមុខពេញទំហឹងបណ្តាលឱ្យស្លាប់ខណៈរថយន្តបង្កបើកវ៉ាប្រជែងរថយន្តទៅបុកជនរងគ្រោះកំពុងជិះម៉ូតូឌុបគ្នាក្នុងទិសដៅច្រាសទិសគ្នា។ អ្នកបើករថយន្តបង្កក្រោយពីកើតហេតុភ្លាមបានរត់គេចខ្លួនបាត់បន្សល់ទុក រថយន្តនៅកន្លែងកើតហេតុ។

ហេតការណ៍កើតឡើងកាលពីវេលាម៉ោង៤និង២០នាទីល្ងាច ថ្ងៃទី១៧ ខែមករា ឆ្នាំ២០១៦ នៅចំណុចភូមិគោកពន្លៃ សង្កាត់ឱម៉ាល់ ក្រុងបាត់ដំបង ខេត្តបាត់ ដំបង។

ជនរងគ្រោះទាំង៣នាក់កូនស្រីឈ្មោះ សម្បត្តិ ស្រីមាន  អាយុ២៧ឆ្នាំ ឳពុកឈ្មោះ  សុខ សម្បត្តិ  អាយុ ៥៦ឆ្នាំ ម្តាយឈ្មោះម៉េវ រ៉េវ អាយុ៥៣ឆ្នាំ ជនរងគ្រោះ រស់នៅភូមិចាក់អង្កាម ឃុំស្នឹង ស្រុកបាណន់ ខេត្តបាត់ដំបង ជនរងគ្រោះពីរនាក់ប្តីប្រពន្ធទើបតែមកពីចូលរួមមង្គលការបងប្អូននៅខេត្តកំពត ហើយឱ្យកូនស្រីមកទទួលនៅបេនឡានបឹងឈូក ជិះត្រឡាប់ទៅផ្ទះវិញក៏ជួបគ្រោះថ្នាក់ស្លាប់ទាំងអស់គ្នាតែម្តង។ម៉ូតូជនរងគ្រោះម៉ាកហុងដាសេ១២៥ ពណ៌ខ្មៅ ពាក់ស្លាកលេខបាត់ដំបង1D-3650។

បើតាមប្រភពព័ត៌មានពីសាក្សីឃើញហេតុការណ៍ប្រាប់ឱ្យដឹងថា មុនពេលកើតហេតុ គេឃើញរថយន្តបង្កម៉ាកកូរ៉ូឡាពណ៌ខ្មៅពាក់ស្លាកលេខបាត់ដំបង2A-2331 បានធ្វើដំណើរក្នុងទិសដៅពីលិចទៅកើតបើកបរល្បឿនលឿនហើយវ៉ាប្រជែងរថយន្ត១គ្រឿងទៀតក្នុងទិសដៅស្របគ្នា រំពេចនោះរថយន្តបង្កម៉ាកកូរ៉ឡាបានបើកជ្រុលចូលទៅបុកចំណែកផ្លូវជនរងគ្រោះជិះម៉ូតូឌុបគ្នា៣នាក់ពេញទំហឹងក្នុងទិសដៅច្រាសទិសគ្នាបណ្តាលឱ្យស្លាប់ទាំង៣នាក់ តែម្តង។ រថយន្តបង្កនិងម៉ូតូជនរងគ្រោះរងការខូចខាតធ្ងន់ខាងមុខដូចគ្នា។

ក្រោយពីកើតហេតុ នោះភ្លាមគេសង្កេតឃើញនគរបាលចរាចរខេត្តបាត់ដំបងបានទៅដល់កន្លែងកើតហេតុ បន្ទាប់ពី អ្នកបើករថយន្តបង្ករត់គេចខ្លួនបាត់ទៅហើយ។ រថយន្តនិងម៉ូតូទាំង២គ្រឿបត្រូវបានសមត្ថកិច្ចយកមករក្សាទុកនៅស្នងការដ្ឋាននគរបាលខេត្តដើម្បីទុកចាត់ការតាមផ្លូវច្បាប់។ ចំណែក អ្នកបើករថយន្តបង្កត្រូវគេរាយការណ៍ឱ្យដឹងថាលោកព្រះរាជអាជ្ញានៃសាលាដំបូងខេត្តចេញបញ្ជាឱ្យសមត្ថកិច្ចស្វែងរកចាប់ខ្លួនដើម្បីយកមកផ្តន្ទាទោសតាមផ្លូវច្បាប់។

គ្រោះថ្នាក់ចរាចរណ៍ខាងលើត្រូវបានសមត្ថកិច្ចជំនាញអះអាងថាបង្កដោយអ្នកបើករថយន្តបើកវ៉ាប្រជែងមិនឃើញឧបសគ្គនៅខាងមុខ៕

ដោយ៖ សំ វិច្ឆិកា