កញ្ញាឯក Miss Grand Cambodia 2016 កញ្ញា ហេង ចន្ថា បានបង្កើតឲ្យមានការភ្ញាក់ផ្អើលក្រោយពីនាងបានបង្ហោះរូបថតក្នុងពិធីភ្ជាប់ពាក្យមួយ។ ទោះជាយ៉ាងណាតារាស្រីរូបនេះបដិសេធថានាងមិនបានភ្ជាប់ពាក្យនោះទេដែលរូបភាពទាំងនោះគឺដកស្រង់ចេញពីការថតភាពយន្តមួយប៉ុណ្ណោះ។
កញ្ញា ហេង ចន្ថា មិនបានបង្ហាញមុខមាត់បុរសដែលលេចមុខក្នុងពិធីភ្ជាប់ពាក្យរបស់នាងសោះឡើយ ទោះបីមានអ្នកគាំទ្រជាច្រើនទទូចសួរនាំ ហើយវែកញែករកមុខក្តី។កាន់តែធ្វើឲ្យអ្នកគាំទ្រចង់ដឹងគឺនាងបានឆ្លើយបែបលេងសើចទៅកាន់អ្នកគាំទ្រនាងថា ខ្លួនមិនបង្ហាញមុខបុរសកំណាន់ចិត្តដែលជាអនាគតស្វាម៉ីនោះទេ ព្រោះខ្លាចគ្រប់គ្នាលង់ស្រលាញ់។ទោះជាយ៉ាងនេះក្តី ការបង្ហាញនេះអាចនឹងធ្វើឲ្យបុរសមួយចំនួនដែលតាមស្នេហ៍នាងខកចិត្តមិនតិចនោះទេ។ ឆ្លើយឆ្លងតាមការជជីកសួរតាមសារអេឡិចត្រូនិចជាមួយអ្នកសារព័ត៌មានយើង ហេង ចន្ថា បញ្ជាក់ថា រូបថតដែលនាងបង្ហាញលើ Story ហ្វេសប៊ុកនោះត្រឹមតែជាឈុតក្នុងការសម្តែងក្នុងភាពយន្តភាគមួយប៉ុណ្ណោះ ប៉ុន្តែនាងនាងស្នើមិនបញ្ជាក់ចំណងជើងរឿង។ នាងថាសុំកុំមានការភ័ន្តច្រឡំ នាងថាកន្លងមកថ្មីៗនេះនាងទទួលបានឱកាសការសម្តែងភាពយន្តថ្មីជាបន្តបន្ទាប់ក្រោយពីភាពយន្តបែបកំប្លែង រឿង”លោកប្តី” ទទួលបានការគាំទ្រច្រើនពីទស្សនិកជន។ ហេង ចន្ថាលើកឡើងថានាងក៏គ្រោងនឹងបញ្ចេញស្នាដៃថ្មីៗជាច្រើនបន្តទៀតក្នុងពេលដ៏ខ្លីខាងមុខ។
គួរបញ្ជាក់ដែរថាកញ្ញា ហេង ចន្ថា ធ្លាប់ខកខានការចេញទៅប្រកួត Miss Grand International ២០១៦ នៅ The Westgate Las Vegas Resort & Casino ក្រុងឡាសវេហ្គាស រដ្ឋនេវ៉ាដា កាលពីចុងឆ្នាំ២០១៦ក្រោយពីមិនបានទទួលទិដ្ឋាការក្នុងការទៅសហរដ្ឋអាមេរិកនោះ ។ ទោះជាយ៉ាងណានាងទទួលបានឱកាសការងារសិល្បៈជាអ្នកបង្ហាញម៉ូត និងសម្តែងក្នុងភាពយន្តក្នុងស្រុកជាបន្តបន្ទាប់៕
ដោយ វឌ្ឍនា
