ខេត្តកណ្តាល៖ បុរសម្នាក់ជាជនជាតិវៀតណាម ត្រូវបានសមត្ថកិច្ចនគរបាលស្រុកស្អាងចាប់ខ្លួន ខណៈកំពុងធ្វើសកម្មភាពចែកចាយគ្រឿងញៀនទៅឲ្យអ្នកប្រើប្រាស់ កាលពីវេលម៉ោង២១ និង២០នាទី ថ្ងៃទី១៩ ខែមករា ឆ្នាំ២០១៦ តាមបណ្តោយផ្លូវជាតិលេខ១១០ ស្ថិតក្នុងភូមិបារ៉ែន ឃុំស្វាយប្រទាល ស្រុកស្អាង ។
ក្នុងប្រតិបត្តិការឃាត់ខ្លួនជនសង្ស័យជាមុខសញ្ញាចែកចាយគ្រឿងញៀន ខាងលើនេះសមត្ថកិច្ចដកហូតបានវត្ថុតាង ថ្នាំញៀនប្រភេទមេតំហ្វេតាមីន ហៅម៉ាទឹកកកចំនួន៥កញ្ចប់តូច ,ទូរស័ព្ទដៃចំនួន០១គ្រឿង ,កញ្ចប់បារីហ្វីនចំនួន០១កញ្ចប់ មានបារី០២ដើម និងដែកកេះចំនួន០១ផងដែរ ។
មន្ត្រីនគរបាលស្រុកស្អាងបានឲ្យដឹងថា ជនសង្ស័យដែលត្រូវបានឃាត់ខ្លួននោះមានឈ្មោះ មៀង យឿងភេទប្រុសអាយុ២៥ឆ្នាំជនជាតិវៀតណាមមានមុខរបរជាងឈើ បច្ចុប្បន្នស្នាក់នៅក្នុងភូមិបារ៉ែន ឃុំស្វាយប្រទាល ស្រុកស្អាង ។
ប្រភពដដែលបានបន្តថា នៅមុនពេលឃាត់ខ្លួនជនសង្ស័យខាងលើនេះសមត្ថកិច្ចនគរបាលប៉ុស្តិ៍រដ្ឋបាលស្វាយប្រទាលបានចេញល្បាតតាមបណ្តោយផ្លូវជាតិលេខ១១០ ត្រើយខាងកើតទន្លេបាសាក់ ខណៈល្បាតដល់ចំណុចភូមិបារ៉ែនក៏បានប្រទះឃើញជនសង្ស័យកំពុងធ្វើសកម្មភាពចែកចាយគ្រឿងញៀនទៅអ្នកប្រើប្រាស់ ។ ភ្លាមៗនោះសមត្ថកិច្ចនគរបាលបានចូលទៅឃាត់ខ្លួនជនសង្ស័យជាអ្នកចែកចាយគ្រឿងញៀនដើម្បីចាត់ការតាមច្បាប់ ខណៈដែលជនសង្ស័យជាអ្នកប្រើប្រាស់គ្រឿងញៀនរត់គេចខ្លួនបាត់ ៕
ដោយ៖ ស្អាងជ័យ
