ប្រភពព័ត៌មានពីប៉ូលិសប៉ាគីស្ថានបានថ្លែងកាលពីថ្ងៃទី១៩ ខែមករា ឆ្នាំ២០១៦ថា យ៉ាងហោចណាស់មនុស្ស៧នាក់បានបាត់បង់ជីវិត បន្ទាប់ពីហេតុការណ៍វាយប្រហារដោយការបំផ្ទុះគ្រាប់បែកស្ថិតនៅជិតប៉ុស្តិ៍ត្រួតពិនិត្យសន្តិសុខមួយកន្លែង ភាគពាយព្យប្រទេសប៉ាគីស្ថាន ។
ប្រភពបន្តថា ជាមួយគ្នានេះដែរ ជនរងគ្រោះប្រមាណ២០នាក់ថែមទៀតបានរងរបួស ដោយសារតែការវាយប្រហារនេះ ដែលបានកើតឡើងនៅតំបន់ Federally Administered Tribal Areas (FATA) ជាយក្រុង Peshawar ប្រទេសប៉ាគីស្ថាន។
ស្ថិតនៅពេលបច្ចុប្បន្ននេះ ក្រុមសកម្មប្រយុទ្ធតាលីបង់ និងកងកម្លាំងសន្តិសុខរដ្ឋាភិបាលបាននិងកំពុងវាយប្រយុទ្ធគ្នាទៅវិញទៅមក ។
ការវាយប្រហារដោយបំផ្ទុះគ្រាប់បែកនៅជិតទីតាំងត្រួតពិនិត្យសន្តិសុខ តំបន់ជាយក្រុង Peshawar បណ្តាលឲ្យស្លាប់ និងរបួសយ៉ាងរដូករណែលនេះ មិនទាន់មានក្រុមណាមួយចេញមុខប្រកាសទទួលខុសត្រូវនៅឡើយទេ ។
បណ្តាញទូរទស្សន៍ក្នុងតំបន់បានផ្សព្វផ្សាយឲ្យឃើញថា រថយន្តត្រូវភ្លើងឆាបឆេះយ៉ាងសន្ធោសន្ធៅនៅជិតកន្លែងកើតហេតុ បន្ទាប់ពីមានហេតការណ៍ផ្ទុះគ្រាប់បែកកើតឡើងនោះ ។ ការបំផ្ទុះនេះបានកើតឡើងនៅជិតផ្សារ Karkhano មិនឆ្ងាយប៉ុន្មានពីទីក្រុង Peshawar នោះឡើយ ។ នេះបើតាមប្រភពព័ត៌មាន The Express Tribune។
សាក្សីឃើញហេតុការណ៍បានបញ្ជាក់ថា គ្រាប់បែកត្រូវគេបង្កប់នៅលើម៉ូតូមួយគ្រឿង ប៉ុន្តែនៅមិនទាន់ដឹងច្បាស់ឡើយ ថា តើជាការវាយប្រហារអត្តឃាត ឬជាការវាយប្រហារដោយបញ្ជាតាមឧបករណ៍បំផ្ទុះពីចម្ងាយនោះឡើយ ។
កាលពីខែធ្នូ ឆ្នាំ២០១៦ ស្ថិតនៅភាគពាយព្យប្រទេសប៉ាគីស្ថាន មានការវាយប្រហារអត្តឃាតទៅលើអគាររដ្ឋាភិបាលមួយកន្លែងបណ្តាលឲ្យស្លាប់មនុស្ស២៦នាក់ផងដែរ ៕
ប្រែសម្រួល៖ ថាច់ យ៉ាត
