ភ្នំពេញ៖ រោងភាពយន្តទាំងអស់នៅកម្ពុជាត្រូវបានប្រកាសឲ្យផ្អាកដំណើរការចាក់បញ្ចាំង​ភាពយន្ត ព្រោះតែការរាតត្បាតនៃជំងឺកូវីដ១៩ ដែលធ្វើឲ្យផលិតករភាពយន្តមួយចំនួន​ក៏បានផ្អាកការផលិតភាពយន្តផងដែរ។ ជាមួយគ្នានេះផលិតករលេចធ្លោរលោក ហ៊ុយ យ៉ាឡេង បានសម្រេចបញ្ចេញស្នាដៃសៀវភៅថ្មីរបស់ខ្លួន ដើម្បីបំពេញតម្រូវការមិត្តអ្នកអាន និងអ្នកគាំទ្រស្នាដៃតែងនិពន្ធរបស់លោក។
អ្នកនិពន្ធ និងដឹកនាំរឿង “ធ្មប់” ដ៏ល្បីល្បាញ លោក ហ៊ុយ យ៉ាងឡេង
ទើបបញ្ចេញសៀមភៅដែលលោកនិពន្ធទៅលើទីផ្សារមុននេះបន្តិច ចំណងជើងថា “ខ្មោចចូល” និយាយពីនាយទាហានម្នាក់ឈ្មោះឧត្តម ដែលបាត់ខ្លួនក្នុងរបបសាធារណរដ្ឋ ហើយត្រូវគ្រួសារគិតថាបានស្លាប់បាត់បង់ជីវិតទៅហើយ ក៏ប៉ុន្តែថ្ងៃមួយលោកបែរបង្ហាញខ្លួននៅមុខផ្ទះ។ បន្ទាប់ពីត្រឡប់វិញ ឧត្តម បានអួតប្រាប់គ្រប់គ្នាថា ការដែលខ្លួនមិនស្លាប់ ព្រោះមានខ្នាយបារមីដែលគ្រូគេបានឲ្យ។
រឿងរ៉ាវដ៏ប្រទាក់ក្រឡានៃខ្សែរបស់នាយទាហានរូបនេះ ក៏ត្រូវបានចាប់ផ្តើមពីចំណុចនេះ។ ចង់ជ្រាបអំពីអត្ថន័យ សាច់រឿងបែបណានោះ លោកអ្នកអាចធ្វើការកក់សៀវភៅរឿង ខ្មោចចូល ប្រភេទភ័យរន្ធត់ បានឥឡូវនេះក្នុងតម្លៃត្រឹមតែ ២៤០០០ រៀលប៉ុណ្ណោះ។
​ផលិតកររូបនេះលើកឡើងថា ផលិតកម្មលោកផ្អាកដំណើរការនៃការផលិតភាពយន្តជាច្រើនខែមកហើយ ប៉ុន្តែតាមការសំណូមពររបស់អ្នកគាំទ្រលោក នៅតែចង់តាមដានស្នាដៃនិពន្ធរបស់លោក។ លោកថា គម្រោងថតភាពយន្តថ្មីនៅតែបន្ត ប៉ុន្តែត្រូវរងចាំស្ងប់ស្ងាត់ជំងឺកូវីដ១៩ បន្តិច ។ ទោះជាយ៉ាងណាការបញ្ចេញស្នាដៃនិពន្ធថ្មីនៅលើទីផ្សារនេះក៏លោករំពឹងថាទទួលបានការគាំទ្រច្រើនព្រោះតែកន្លងមកលោកធ្លាប់ទទួលបានការពេញចិត្ត និងកោតសរសើរច្រើនលើស្នានៃនិពន្ធសៀវភៅនេះផងដែរ៕

ដោយ វឌ្ឍនា