ភ្នំពេញ៖​ បុរសម្នាក់បានរងរបួសស្រាលខណៈកំពុងជិះម៉ូតូម៉ាកViva១គ្រឿងត្រូវបុរសម្នាក់បើករថយន្ដម៉ាកRangRoverមកបុកចំពីមុខពេញទំហឹងរួចអូសម៉ូតូជាប់ក្រោមរថយន្ដប្រហែល២០ម៉ែត្រទើបរថយន្ដឈប់ទៅមុខលែងរួច។

ហេតុការណ៍នេះបានកើតឡើងកាលពីវេលាម៉ោង២២ និង៣០នាទីយប់ថ្ងៃទី២០​ ខែមករា​ ឆ្នាំ២០១៦​ នៅចំណុចផ្លូវលេខ១១៣កែងនឹងផ្លូវលេខ២៤២​ ស្ថិតក្នុងសង្កាត់​បឹងព្រលិត​ ខណ្ឌ៧មករា​ រាជធានីភ្នំពេញ។

ប្រភពព័ត៌មានពីកន្លែកើតហេតុបានអោយដឹងថា នៅមុនពេលកើតហេតុគេបានឃើញបុរសម្នាក់ជិះម៉ូតូViva ពណ៍ខ្មៅ ពាក់ស្លាកលេខ​ ត-3526 ភព1 បើកបរដោយបុរសម្នាក់ធ្វើដំណើរតាមបណ្ដោយផ្លូវលេខ១១៣ក្នុងទិសដៅពីត្បូងទៅជើងលុះមកដល់ចំណុចកើតហេតុខាងលើក៏ស្រាប់តែមានរថយន្ដម៉ាកRangRover ពណ៍ខ្មៅ ពាក់ស្លាកលេខ​ ភ្នំពេញ2V-9959 ធ្វើដំណើរបញ្ច្រាសទិសគ្នាបានជ្រុលបុកគ្នាពេញទំហឹងបណ្ដាលបុរសជាម្ចាស់ម៉ូតូខ្ទាតចេញពីម៉ូតូរងរបួសស្រាល។

ប្រភពដដែលបានបន្តថា ក្រោយពីបុករួចហើយម៉ូតូបានកល់ជាប់ក្រោមរថយន្ដហើយម្ចាស់រថយន្ដបានព្យាយាមបើករត់គេចខ្លួនបានប្រហែល២០ម៉ែត្រទើបរថយន្ដទៅមុខលែងរួច។

ក្រោយមកកម្លាំងសមត្ថកិច្ចបានចុះដល់កន្លែងកើតហេតុនិងធ្វើការសម្របសម្រួលដោយភាគីខាងរថយន្ដព្រមសងថ្លៃការខូចខាតនិងព្យាបាលរបួសអោយទៅខាងម្ចាស់ម៉ូតូដើម្បីបញ្ចប់រឿងនៅកន្លែងកើតហេតតែម្ដង៕

ដោយ៖ ស រស្មី