ខេត្តស្វាយរៀង៖ មន្រ្តីជំនាញខេត្តស្វាយរៀងបានរកឃើញគុយទាវសរសៃធំមានសារធាតុគីមីបូរ៉ាក់,ទំនិញខូចគុណភាពនិងហួសកាលបរិច្ឆេទក្នុងនោះមានត្រីខកំប៉ុង ទឹកក្រូចម៉ាកXL ម្ទេសឆារ បឺរនិងសាតេ នៅព្រឹកថ្ងៃទី៣ ខែកក្កដា ឆ្នាំ២០២០នេះពេលចុះពិនិត្យមុខទំនិញនៅផ្សារប្រសូត្រស្ថិតក្នុងឃុំប្រសូត្រ ស្រុកស្វាយទាប ខេត្តស្វាយរៀង។

យោងតាមមន្ត្រីការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំបានឱ្យដឹងថាក្រុមការងារសហការជាមួយមន្ត្រីមន្ទីរពាណិជ្ជកម្ម ខេត្តស្វាយរៀង បានចុះពិនិត្យមុខទំនិញនៅផ្សារប្រសូត្រស្ថិតក្នុងឃុំប្រសូត្រ ស្រុកស្វាយទាប ខេត្តស្វាយរៀង ក្នុងគោលបំណងស្វែងរកសារធាតុគីមី។

ប្រភពបន្តថា សកម្មភាពចុះត្រួតពិនិត្យនៅផ្សារប្រសូត្រ មន្ត្រីជំនាញបានពិនិត្យមើលគ្រឿងឧបភោគបរិភោគដែលដាក់លក់តាមស្តង់ក្នុងផ្សារដោយបាន ប្រើប្រាស់ឧបករណ៍ធ្វើTest Kits បឋមលើម្ហូបអាហារចំនួន៣៦គំរូ ដើម្បីស្វែងរកសារធាតុគីមីហាមឃាត់ដែលធ្វើឱ្យប៉ះពាល់ដល់សុខភាពប្រជាពលរដ្ឋ។

ជាលទ្ធផលក្រោយពីការអនុវត្តការងារមន្ត្រីជំនាញបានរកឃើញទំនិញខូចគុណភាព និងហួសកាលបរិច្ឆេទប្រើប្រាស់ចំនួន៦មុខមានដូចជា៖ ត្រីខ២០កំប៉ុងស្មើនឺង២០គីឡូក្រាម,
ទឹកក្រូចម៉ាកXLចំនួន៤កេស,
ម្ទេសឆារចំនួន២០កំប៉ុង,
បឺរចំនួន១៥កំប៉ុង, សាតេចំនួន១០កំប៉ុងនិងគុយទាវសរសៃធំ៥គីឡូក្រាមមានសារធាតុបូរ៉ាក់ ហើយមន្ត្រីជំនាញបានធ្វើកំណត់ហេតុដកហូតទំនិញទាំងនោះ យកមករក្សាទុកដើម្បីធ្វើការដុតកម្ទេចចោលនៅពេលក្រោយ។

លោកបានបញ្ជាក់ថា មន្ត្រីសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ និងមន្ត្រីមន្ទីរពាណិជ្ជកម្មខេត្តនិឹងចុះពិនិត្យមុខទំនិញឲ្យបានដូចភ្លៀងរលឹមដើម្បីស្វែងរកសារធាតុហាមឃាត់ (សារធាតុគីមី) ដែលធ្វើឲ្យអ្នកបរិភោគអាចប៉ះពាល់ដល់សុខភាព និងស្នើឲ្យអាជីវករចូលរួមសហការជាមួយមន្ត្រីជំនាញក្នុងការចុះត្រួតពិនិត្យទំនិញផ្សេងៗគ្រប់ប្រភេទនៅតាមទីផ្សារក្នុងខេត្តបន្តទៀតផងដែរ៕យឺម សុថាន