នៅថ្ងៃទី៧ ខែកក្កដា ប្រព័ន្ធផ្សព្វផ្សាយអូស្ត្រាលីបានផ្សាយថា រដ្ឋ Victoria មានករណីឆ្លងកូវីដ១៩ ថ្មី ដល់ទៅ១៩១នាក់ ក្នុងរយៈពេល ២៤ម៉ោង គឺជាកម្រិត ឆ្លងច្រើនបំផុតមិនធ្លាប់មានចាប់តាំងពី ការផ្ទុះកូវីដ១៩ នៅក្នុងប្រទេសនេះ។

អភិបាលរដ្ឋ Victoria លោក Daniel Andrews បានបញ្ជាក់ថា មានករណីឆ្លងកូវីដ១៩ថ្មីចំនួន ១៩១នាក់ក្នុងរយៈពេល២៤ម៉ោងដែលបង្កការលំបាកក្នុងការតាមដានទំនាក់ទំនងរបស់មនុស្សដែលបានឆ្លងជំងឺនេះ។ លោកបានមានប្រសាសន៍ថា«ទាំងនេះមិនមែនជាតួលេខចុងក្រោយនោះឡើយ»។
ក្នុងថ្ងៃជាមួយគ្នានេះដែរ មន្ត្រីរដ្ឋាភិបាលទីក្រុង ម៉ែលប៊នបានប្រកាសថានឹងអនុម័តបិទទីក្រុងធំបំផុត ដែលមានពលរដ្ឋជាង៥លាននាក់ ក្នុងរយៈពេល៦សប្តាហ៍ គឺចាប់ពីពាក់កណ្តាលយប់ថ្ងៃទី ៨ខែកក្កដា ។ ការសម្រេចខាងលើកើតឡើងក្រោយពេល ពលរដ្ឋឆ្លងកូវីដ១៩ កាន់តែច្រើន ។ ជាមួយគ្នានេះដែរ សិស្សសាលា ក៏បានវិលទ្រឡប់សិក្សាអនឡាញពីចម្ងាយវិញ។

ការឆ្លងរាលដាលលើកទីពីរនៅអូស្ត្រាលី អាចអាក្រក់ជាងលើកទីមួយ ដោយការឆ្លងលើកទីមួយជាប់ពាក់ព័ន្ធ អ្នកដំណើរពីក្រៅប្រទេស។ ចំណែកលើកទីពីរ គឺឆ្លងនៅក្នុងសហគមន៍ គឺជាផលលំបាក់យ៉ាងខ្លាំងនៅក្នុងការតាមដាន ពីប្រភពឆ្លង ។ កត្តាទាំងនោះហើយ ទើប រដ្ឋ វិដទ័ររៀ ដែលមានទីក្រុងម៉ែលប៊ន ត្រូវការបិទទ្វារជាថ្មីទប់ស្កាត់ការឆ្លងរាលដាលកូវីដ១៩ ជៀងវាងហេតុការអាក្រក់កើតឡើង៕ ដោយ៖ធីរីណា