ខេត្តស្វាយរៀង៖បុរសម្នាក់ស្លាប់នឹងម្នាក់ទៀតរងរបួសខណះស្រវឹងស្រាប្រើប្រាស់ល្បឿនលឿនជិះម៉ូតូទៅបុកគូថរថយន្តមិនស្គាល់ម៉ាកពីក្រោយយ៉ាងពេញទំហឹងលាន់ដូចរន្ទះបង្កការភ្ញាក់ផ្អើលដល់អ្នកភូមិទាំងយប់។

ហេតុការណ៏នេះបានកើតឡើងកាលពីវេលាម៉ោង៨និង៥នាទីយប់ថ្ងៃទី០២ ខែសីហាឆ្នាំ២០២០នៅលើផ្លូវជាតិលេខ០១ចន្លោះ គឺឡូម៉ែត្រលេខ ១៤៤និង១៤៥ស្ថិតក្នុងភូមិសាមគ្គី សង្កាត់ច្រកម្ទេស ក្រុងបាវិត ខេត្តស្វាយរៀង។

បើតាមសមត្ថកិច្ចនគរបាលក្រុងបាវិតបានអោយដឹងថាបុរសដែលស្លាប់មានឈ្មោះ រាជ ពិសិដ្ឋ  អាយុ ២១ឆ្នាំ ជនជាតិខ្មែរ មុខរបរកម្មករសំណង់ មានទីលំនៅភូមិទួលអំពិល សង្កាត់ ច្រកម្ទេស ក្រុងបាវិត ខេត្តស្វាយរៀងនិងអ្នករួមដំណើររងរបួសស្រាលមានឈ្មោះសុខ គា  អាយុ ១៧ ឆ្នាំ ជនជាតិខ្មែរ មុខរបរកម្មករសំណង់ មានទីលំនៅភូមិថ្នល់ទទឹង សង្កាត់ ច្រកម្ទេស ក្រុងបាវិត ខេត្តស្វាយរៀង។

ចំណែកអ្នកបើករថយន្តមិនត្រូវបានស្គាល់ឈ្មោះនោះទេក្រោយកើតហេតុបើករថយន្តមិនស្គាល់ម៉ាកគេចចេញទៅទិសខាងលិចបាត់ស្រមោល។

បើតាមសាក្សីបានអោយដឹងថាមុនកើតហេតុមានម៉ូតូ មួយគ្រឿង ម៉ាកZUSUKI ស្មាក់ពណ៏ខ្មៅ ពាក់ស្លាកលេខ ភ្នំពេញ ១W-១០៤៨ ជិះគ្នា២នាក់
ក្នុងទិសដៅពីកើតទៅលិច សង្ស័យស្រវឹងស្រាប្រើប្រាស់ល្បឿនលឿនលុះមកដល់ចំណុចកើតហេតុខាងលើ ក៍បានទៅបុកពីក្រោយរថយន្តមួយគ្រឿងមិនស្គាល់ម៉ាក ពីក្រោយពេញទំហឹងបង្កការភ្ញាក់ផ្អើលដល់អ្នកភូមិរាយការណ៏មកសមត្ថកិច្ចមូលដ្ឋានតែម្ដង។

បច្ចុប្បន្នអ្នករងបួសត្រូវបានសម្រាកព្យាបាល នៅមន្ទីរពេទ្យបង្អែកជីភូ  រីឯសាកសពត្រូវបានសមត្ថកិច្ចប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី៕