ការប្រកួតក្របខ័ណ្ឌ UEFA Europa League វគ្គ១៦ក្រុមចុងក្រោយបានរកឃើញ៤ក្រុមឡើងឈរចាំទៅវគ្គ៨ក្រុមចុងក្រោយហើយ ក្នុងនោះក្រុមបិសាចក្រហម Manchester United បានផ្តួលក្រុមមកពីអូទ្រីស LASK នៅកីឡដ្ឋាន Old Trafford ក្នុងលទ្ធផល២ទល់១នៅជើងទី២ សរុបទាំងពី២ជើងលទ្ធផល ៧-១។

២គ្រាប់រកបានដោយកីឡាករ Jesse Lingard នៅនាទីទី៥៧ និងកីឡាករ Anthony Martial នៅនាទីទី៨៨ ដែលសុទ្ធតែជាការបញ្ជូនបាល់យ៉ាងល្អពីខ្សែបម្រើ Juan Mata ។ ចំណែក១គ្រាប់របស់ក្រុមភ្ញៀវរកបានដោយកីឡាករ Wiesinger នៅនាទីទី៥៥។

ក្រុមម្ចាស់ជើងឯកលីកកំពូលអ៊ុយក្រែន Shakhtar Donetsk បានយកឈ្នះក្រុម Wolfsburg មកពីអាល្លឺម៉ង់ក្នុងលទ្ធផល៣ទល់០ សរុបទាំង២ជើងលទ្ធផល ៥ទល់១។ ៣គ្រាប់សម្រាប់ក្រុមម្ចាស់ផ្ទះ Shakhtar Donetsk គ្រាប់ទី១រកបានដោយកីឡាករ Júnior Moraes នៅនាទីទី៨៩ គ្រាប់ទី២រកបានដោយកីឡាករ M. Solomon នៅនាទីទី៩០+១ និងគ្រាប់ទី៣រកនបានដោយកីឡាករ Júnior Moraesដដែលនៅនាទីទី៩០+៣ ។

ចំណែកក្រុមខ្លាំងអ៊ីតាលី Inter Milan បានយកឈ្នះក្រុមភ្ញៀវរបស់អេស្ប៉ាញ Getafe ក្នុងលទ្ធផល២ទល់០ ដែលគ្រាប់ទី១រកបានដោយខ្សែប្រយុទ្ធបែលហ្ស៊ិក Lukaku នៅនាទីទី៣៣ និង១គ្រាប់ទៀតរកបានដោយកីឡាករ Eriksen នៅនាទីទី៨៣។

ដោយឡែក១ក្រុមទៀតគឺក្រុមខ្លាំងមកពីដាណឺម៉ាក Copenhagen បានយកឈ្នះក្រុមខ្លាំងមកពីទួរគី Istanbul Basaksehir សម្រាប់ជើងទី២ក្នុងលទ្ធផល ៣ទល់០។ ៣គ្រាប់របស់ក្រុមម្ចាស់ផ្ទះរកបានដោយកីឡាករ Wind នៅនាទីទី៤ និងនាទីទី៥៣ ដោយបាល់ពិន័យ១១ម៉ែត្រ និងគ្រាប់ទី៣រកបានដោយកីឡាករ Falk នៅនាទីទី៦១។

សូមបញ្ជាក់ថា ការប្រកួតវគ្គ១៦ក្រុមចុងក្រោយនៅសល់យប់នេះទៀតសម្រាប់ជើងទី២ ដែលជាការជួបគ្នារវាងក្រុម Bayer Leverkusen ប៉ះជាមួយក្រុម Rangers នៅម៉ោង១១និង៥៥នាទីយប់, ក្រុម Sevilla ប៉ះក្រុម Roma នៅម៉ោង១១និង៥៥នាទីយប់ដែរ, ក្រុម Wolverhampton ប៉ះក្រុម Olympiakos ម៉ោង២រំលងអធ្រាត្រ និងក្រុម Basel ប៉ះក្រុម Eintracht Frankfurt នៅម៉ោង២រំលងអធ្រាត្រដូចគ្នា។

វគ្គ៨ក្រុមចុងក្រោយគឺក្រុមបិសាចក្រហម Man United ត្រូវប៉ះជាមួយក្រុម Copenhagen នៅថ្ងៃទី១១ សីហា, ក្រុម Inter Milan ត្រូវប៉ះក្រុម Rangers ឬក្រុម Bayer Leverkusen នៅថ្ងៃទី១១ សីហាដូចគ្នា។ ចំណែកក្រុម Shakhtar Donetsk ត្រូវប៉ះក្រម Basel ឬក្រុម Eintracht Frankfurt នៅថ្ងៃទី១២ សីហា។ ដោយឡែកការប្រកួតវគ្គ១ភាគ៤ផ្តាច់ព្រ័ត្រគ្រោងធ្វើនៅថ្ងៃទី១៧-១៨ សីហា ខណៈវគ្គផ្តាច់ព្រ័ត្រធ្វើឡើងនៅថ្ងៃទី២២ ខែសីហាខាងមុខនេះ ៕

ដោយ៖ ភារៈ