ខេត្តសៀមរាប៖ យោងតាមសេចក្តីជូនដំណឹងរបស់រដ្ឋបាលខេត្ត កាលពីថ្មីៗនេះ បានបញ្ជាក់ថា ខេត្តសៀមរាប នឹងរៀបចំពិធីកម្សាន្តរយៈពេល៥ថ្ងៃ គឺចាប់ពីថ្ងៃទី១៧ ដល់ទី២១ សីហា ខាងមុខនេះ បន្ទាប់ពីរាជរដ្ឋាភិបាលកម្ពុជា បានអនុញ្ញាតឲ្យពលរដ្ឋឈប់សម្រាកចំនួន៥ថ្ងៃដើម្បីសងថ្ងៃបុណ្យចូលឆ្នាំខ្មែរកន្លងទៅ ។
រដ្ឋបាលខេត្តសៀមរាប បានបញ្ជាក់ថា កម្មវិធីសាសនា កម្មិវធីកម្សាន្តជាច្រើន បានរៀបចំឡើង ដើម្បីធ្វើឱ្យវិស័យទេសចរណ៍ក្នុងខេត្តសៀមរាប មានចរន្តឡើងវិញ ក្រោយជាប់គាំងច្រើនខែ ដោយសារវិបត្តិជំងឺកូវីដ-១៩។ ជាក់ស្ដែងតំបន់សំខាន់ៗ ដូចជា៖ ស្ទឹងសៀមរាបសួនច្បារមាត់ស្ទឹង សុទ្ធតែកំពុងមមាញឹករៀបចំកម្មវិធី ក្នុងនោះអាជ្ញាធរក៏នឹងបើកឡើងវិញនូវតំបន់ផាប់ស្ទ្រីត ដែលជាតំបន់សំខាន់ក្នុងក្រុងសៀមរាបផងដែរ។
ដោយឡែកលោក ទៀ សីហា អភិបាលខេត្តសៀមរាប ក៏បានបញ្ជាក់ថា តំបន់ផាប់ស្ទ្រីត នឹងបើកដំណើរការឡើងវិញ ដើម្បីឱ្យម្ចាស់អាជីវកម្មអាចរកចំណូលបានខ្លះ តែការបើកនេះ មិនមានការបើកភ្លេងរាំកម្សាន្តដូចមុនឡើយ តែជាការបើកក្នុងរូបភាពថ្មី។
លោកអភិបាលខេត្ត បន្តថា អាជ្ញាធរព្យាយាមកែច្នៃយ៉ាងណា ឲ្យអាជីវករអាចរកចំណូលបានខ្លះពីឱកាសថ្ងៃឈប់សម្រាកខាងលើនេះ ។ ប៉ុន្តែហាងនីមួយៗត្រូវតែបន្តអនុវត្តតាមវិធានការរបស់ក្រសួងសុខាភិបាលទាំងអស់គ្នា ដើម្បីចូលរួមទប់ស្កាត់ជំងឺកូវីដ–១៩ ផងដែរ៕ដោយ៖ស តារា
