ខេត្តកំពង់ស្ពឺ៖ សកម្មភាពក្នុងការដឹកជញ្ជូនឈើប្រណិតរបស់ឈ្មួញ ឈ្មោះ ឆាយ ឡុង ដែលត្រូវបានគេដឹងថា ជាសមត្ថកិច្ចផងនោះ នៅតែគឃើ្លនទៅនឹងការបង្ក្រាប ខណៈដែលរូបគេ រួមទាំងភរិយា ស្មើដៃគ្នាក្នុងការប្រមូលទិញឈើ និងដឹកជញ្ជូនស្ទើរតែផ្តាច់មុខក្នុងស្រុកឪរ៉ាល ខេត្តកំពង់ស្ពឺ ។
សមត្ថកិច្ច និងប្រជាពលរដ្ឋ រួមទាំងឈ្មួញផងដែរ បានរាយការណ៍ឲ្យដឹងថា ឆាយ ឡុង បានប្រមូលទិញឈើប្រណិតប្រភេទសុក្រំ និងធ្នង់ ចេញពីតំបន់ជាំ រវាងព្រំប្រទល់ខេត្តកំពង់ស្ពឺ នឹងខេត្តពោធិ៍សាត់ ខេត្តកោះកុងដឹកជញ្ជូនមកភ្នំឪរ៉ាល់ និងប្រមូលទិញក្នុងតំបន់ឪរ៉ាល់ ជួនកាកដឹកពីភ្នំឪរ៉ាល់ ឆ្ពោះទៅកាន់ខេត្តព្រៃវែង ឬឆ្លងទៅប្រទេសវៀតណាម ។ មួយចំនួនទៀត ឆាយ ឡុង បានដឹកចេញពីភ្នំឪរ៉ាល់ យកមកស្តុកទុកក្នុងឃ្លាំងរបស់ខ្លួន ស្ថិតនៅចំណុចផ្សារអូរចំណារ ក្រុងច្បារមន ខេត្តកំពង់ស្ពឺ រួចបន្តទៅខេត្តកំពង់ចាម ឬខេត្តព្រៃវែង ឆ្លងតាមស្ពានព្រែកក្តាម ។
សមត្ថកិច្ចជាច្រើនស្ថាប័នបានស្គាល់ឆាយ ឡុង យ៉ាងច្បាស់ថា ជាសមត្ថកិច្ចផង ជាឈ្មួញឈើផង ជាបុគ្គលដែលចូលចិត្តមោទនភាព យកមេឃទ្រាប់គូថអង្គុយ អ្នកធំក្នុងកម្រិតណាក៏ដោយ ក៏ឆាយ ឡុង រូបនេះ អះអាងថា ខ្លួនស្គាល់ ខ្លួនមានគុណសម្បត្តិ ខ្លួនបានជួយ ទំនុកបម្រុង ឬផ្តល់សេវាក្រោមតុអស់ហើយ ។
ឆាយ ឡុង កំពុងតែ ប្រព្រឹត្តសកម្មភាពដឹកជញ្ជូនឈើកាន់តែខ្លាំងឡើង ក្នុងនោះ យករថយន្តយីឌុបធ្វើជាមធ្យោបាយដឹកជញ្ជូនយ៉ាងខ្លាំងក្លាបំផុត បើដឹកឈើចេញពីភ្នំឪរ៉ាល់មកកាន់ឃ្លាំងរបស់ខ្លួននៅក្រុងច្បារមន ឬចូលទឹកដីខេត្តកំពង់ស្ពឺ បន្តទៅខេត្តព្រៃវែង ។ សមត្ថកិច្ចជាច្រើនស្ថាប័ន មិនត្រឹមតែមិនបង្ក្រាបប៉ុណ្ណោះទេ គេថែមទាំងមានទឹកមាត់ដើម្បីផលប្រយោជន៍ពីឈ្មួញ ឆាយ ឡុងនេះ ក្លាយជាទម្លាប់យូរឆ្នាំរហូតដល់បច្ចុប្បន្ន ៕
ដោយ៖ សុខ ខេមរា
