ភ្នំពេញ៖ ជំទាវរកស៊ីដីធ្លីនៅសង្កាត់ជ្រោយចង្វាដ៏ល្បីឈ្មោះមួយរូប ឈ្មោះ ប៉ែន រត្នថេត អាយុប្រហែលជាង៤០ឆ្នាំ ដែលគេស្គាល់ថា ជាភរិយារបស់លោកឧកញ៉ា ឌុច សារ៉ែម ជាមន្ត្រីបម្រើការនៅទីស្តីការគណៈរដ្ឋមន្ត្រី ត្រូវបានសមត្ថកិច្ចនគរបាលព្រហ្មទណ្ឌនៃក្រសួងមហាផ្ទៃឃាត់ខ្លួនកាលពីថ្ងៃទី៤ ខែកុម្ភៈ ឆ្នាំ២០១៦ ពីបទលួចលក់អចលនទ្រព្យអ្នកដទៃ ។ សូមបញ្ជាក់ថា នៅអំឡុងឆ្នាំ២០០៥ និងឆ្នាំ២០០៦ ឈ្មោះ ប៉ែន រត្នថេត រួមជាមួយអតីតស្វាមីបានទទួលប្រាក់ពីពាណិជ្ជករម្នាក់ដើម្បីរៀបដីក្នុងចំនួនជាច្រើនហិកតាទីតាំងស្ថិតនៅភូមិក្តុល ឃុំកំពង់អុស ស្រុកពញាឮ ខេត្តកណ្តាល ដោយបានបំពេញបែបបទផ្ទេរសិទ្ធិកាន់កាប់ដីធ្លីឲ្យទៅម្ចាស់ប្រាក់ត្រឹមត្រូវតាមច្បាប់ ។ រយៈពេល២ឆ្នាំក្រោយមក ក្នុងអំឡុងឆ្នាំ២០០៨ ឈ្មោះ ប៉ែន រត្នថេត បានលួចយកដីដដែល ដែលមានទីតាំងដូចមានការរៀបរាប់ខាងលើនេះ លក់ឲ្យទៅអ្នកផ្សេងទៀតតែម្នាក់ឯងបាត់ ។
ពាណិជ្ជករដែលជាម្ចាស់ដី បានដាក់ពាក្យប្តឹងចូលមកនាយកដ្ឋាននគរបាលព្រហ្មទណ្ឌនៃក្រសួងមហាផ្ទៃដើម្បីចាត់ការ ។ រហូតមកដល់ល្ងាចថ្ងៃទី៥ ខែកុម្ភៈ ឆ្នាំ២០១៦ ឈ្មោះ ប៉ែន រត្នថេត ត្រូវបានសមត្ថកិច្ចកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញដើម្បីចោទប្រកាន់តាមផ្លូវច្បាប់ ។
ពាក់ព័ន្ធនឹងករណីខាងលើនេះ សមត្ថកិច្ចសុំមិនបញ្ចេញឈ្មោះបានប្រាប់ឲ្យដឹងថា ករណីនេះ កំពុងតែមានអ្នកអន្តរាគមន៍ដ៏ព្រោងព្រាតលូកដៃចូលកិច្ចការផ្ទៃក្នុងរបស់មន្ត្រីនគរបាលយុត្តិធម៌ និងស្ថាប័នអយ្យការដើម្បីឲ្យមានការដោះលែងឈ្មោះប៉ែន រត្នថេត ឲ្យនៅក្រៅឃុំ ប៉ុន្តែជាលទ្ធផល គេពុំទាន់ដឹងថា ឥទ្ធិពលនៃការអន្តរាគមន៍នោះអាចទៅរួចនឹងផ្លូវច្បាប់ឬយ៉ាងណា ៕ សុខ ខេមរ៉ា
