អន្តរជាតិ៖ បើយោងតាមអ្នកនាំពាក្យរដ្ឋាភិបាលអាល្លឺម៉ង់ លោក Steffen Siebert បានបញ្ជាក់ថា មេដឹកនាំបក្សប្រឆាំងរុស្ស៊ី លោក Alexei Navalny ត្រូវថ្នាំពុលប្រភេទ Novichok ។ ក្រោយការធ្វើតេស្តរបស់កងទ័ពអាល្លឺម៉ង់លើលោក Navalny ដែលកំពុងសម្រាកព្យាបាលមន្ទីរពេទ្យមួយនៅរដ្ឋធានី បែរឡាំង បានផ្ដល់នូវភស្តុតាងច្បាស់នៃថ្នាំពុលប្រភេទ Novichok ។
អ្នកនាំពាក្យរដ្ឋាភិបាលអាល្លឺម៉ង់រូបនេះ បានគូសបញ្ជាក់នៅក្នុងសេចក្តីថ្លែងការណ៍ កាលពីថ្ងៃទី២ ខែកញ្ញាម្សិលមិញនេះថា នេះ គឺជាថ្នាំពុលប្រភេទដូចគ្នាដែលត្រូវបានប្រើលើអតីតចារកម្មរុស្ស៊ីធ្វើការឲ្យអង់គ្លេស Sergei Skripal។ ភ្លាមៗ ទីក្រុងបែរឡាំង ទាមទារចម្លើយពីរដ្ឋាភិបាលរុស្ស៊ីពាក់ព័ន្ធរឿងនេះ។
សូមជម្រាបថា ថ្នាំពុលត្រកូល Novichok គឺជាថ្នាំពុលកម្រិតថ្នាក់យោធា ដែលត្រូវបានអភិវឌ្ឍដោយរដ្ឋាភិបាលសហភាពសូវៀតក្នុងចន្លោះទសវត្សរ៍ឆ្នាំ១៩៧០ និងឆ្នាំ១៩៨០ ហើយអាចប្រើក្នុងទម្រង់ជាម្សៅ រាវ ឬចំហាយ។
បើតាមការចុះផ្សាយរបស់សារព័ត៌មាន BBC ជុំវិញទាក់ទិននឹងលិទ្ធផលនេះ អធិបការបតីអាល្លឺម៉ង់ អ្នកស្រី Angela Merkel និយាយថាឥឡូវនេះវាជាសំណួរដែលមានតែរដ្ឋាភិបាលរុស្ស៊ីអាច និងត្រូវឆ្លើយហើយ។ អ្នកស្រី Angela សង្កត់ធ្ងន់ថា៖«មានអ្នកព្យាយាមបំបិទមាត់ [លោក Navalny] ហើយតាងនាមឲ្យរដ្ឋាភិបាលអាល្លឺម៉ង់ទាំងមូល ខ្ញុំថ្កោលទោសធ្ងន់ធ្ងរចំពោះរឿងនេះ»។
បើតាមការចុះផ្សាយរបស់ទីភ្នាក់ងារព័ត៌មាន AFP វិញ បានដកស្រង់សម្តីរដ្ឋមន្ត្រីការបរទេសអាល្លឺម៉ង់ លោក Heiko Maas បានលើកឡើងថា រដ្ឋាភិបាលលោកបានកោះហៅអគ្គរដ្ឋទូតរុស្ស៊ីឲ្យផ្ដល់ចម្លើយក្នុងសំណុំរឿងនេះ។ ជាមួយគ្នានេះដែរ លោកនាយករដ្ឋមន្ត្រីចក្រភពអង់គ្លេស បូរីស ចនសុន តាមរយៈបណ្ដាញសង្គម Twitter ក៏បានចេញថ្កោលទោសចំពោះការវាយប្រហារដោយប្រើថ្នាំពុល Novichok ដោយទាមទារឲ្យរដ្ឋាភិបាលរុស្ស៊ីពន្យល់អ្វីដែលបានកើតឡើងលើលោក Navalny ។
ដោយឡែក ក្នុងសេចក្តីថ្លែងការណ៍នៅថ្ងៃទី ២ ខែកញ្ញាម្សិលមិញនេះ សហភាពអឺរ៉ុប (EU) បានទាមទារឲ្យមានការស៊ើបអង្កេតដោយតម្លាភាពមួយពីសំណាក់រដ្ឋាភិបាលរុស្ស៊ី។ បន្ថែមពីនេះ សហភាពអឺរ៉ុប សង្កត់ធ្ងន់ថា៖ បុគ្គលដែលទទួលខុសត្រូវចំពោះការវាយប្រហារលើលោក Navalny ត្រូវតែនាំខ្លួនមកកាត់ទោស។
គួរបញ្ជាក់ថា មេដឹកនាំបក្សប្រឆាំងរុស្ស៊ី លោក Alexei Navalny អាយុ៤៤ឆ្នាំ បានធ្លាក់ខ្លួនឈឺ ក្រោយឡើងជិះយន្តហោះមួយក្នុងតំបន់Siberia ក្នុងប្រទេសរុស្ស៊ី កាលពីខែមុន។ រីឯអ្នកគាំទ្រលោក Navalny សង្ស័យថា ទឹកតែដែលលោកផឹកនៅមុនពេលឡើងយន្តហោះមានថ្នាំពុល។ ដោយដំបូងឡើយ លោក Navalny ត្រូវបានសម្រាកព្យាបាលក្នុងមន្ទីរពេទ្យក្នុងតំបន់នោះ មុនពេលដឹកទៅព្យាបាលនៅមន្ទីរពេទ្យCharite ក្នុងទីក្រុងបែរឡាំងវិញ។
បើតាមការអះអាងពីមន្ទីរពេទ្យអាល្លឺម៉ង់ បានបញ្ជាក់ថាកាលពីសប្ដាហ៍មុនថា សុខភាពលោក Navalny បានធូរស្រាលខ្លះ តែមិនទាន់ដឹងខ្លួននៅឡើយ ហើយត្រូវបន្តបំពាក់ប្រដាប់ជំនួយការដកដង្ហើមដដែល។
គួរជម្រាបផងដែរថា លោក Navalny គឺជាសកម្មជនប្រឆាំងអំពើពុករលួយ ដែលធ្លាប់បានដឹកនាំបាតុកម្មទ្រង់ទ្រាយធំប្រឆាំងរដ្ឋាភិបាលលោកប្រធានាធិបតី វ្ល៉ាឌីមៀ ពូទីន។ លោកថែមទាំងហៅបក្សកាន់អំណាចរុស្ស៊ី បច្ចុប្បន្នថាជាចោរដែលកំពុងជញ្ជក់ឈាមរុស្ស៊ី។ មេដឹកនាំបក្សប្រឆាំងរូបនេះ ក៏ត្រូវបានហាមឃាត់ពីការឈរឈ្មោះប្រឆាំងលោក ពូទីន ក្នុងការបោះឆ្នោតផងដែរ។
ក្រៅពីករណីលោក Navalny ក៏ធ្លាប់មានករណីបំពុលដែលសង្ស័យជាប់ពាក់ព័ន្ធនឹងរុស្ស៊ីដូចគ្នាកើតឡើងក្នុងចក្រភពអង់គ្លេស។ តួយ៉ាង ក្នុងឆ្នាំ២០១៨ វិមានក្រេមឡាំង ក៏ធ្លាប់ត្រូវបានចោទប្រកាន់ថានៅពីក្រោយការប៉ុនប៉ងធ្វើឃាតកម្មលើអតីតចារកម្មរុស្ស៊ីធ្វើការឲ្យអង់គ្លេសSergei Skripal ដោយប្រើប្រាស់ថ្នាំពុលប្រភេទ Novichok ៕ ដោយ៖ស តារា
