ខេត្តត្បូងឃ្មុំ៖ យុវជនដែលបានបង្ហោះវីដេអូ Tik Tok ថាប្រាសាទអង្គរវត្តមិនមែនជារបស់ខ្មែរ ត្រូវចៅក្រមស៉ើបសួរ សាលាដំបូងខេត្តត្បូងឃ្មុំ បានចេញដីកាសម្រេចឃុំខ្លួនជាបណ្តោះអាសន្ន ដោយចោទប្រកាន់ពីបទ «ញុះញុងឲ្យមានការរើសអើងពូជសាសន៍»។ បន្ទាប់ពីសមត្ថកិច្ចនគរបាលស្រុកតំបែរ បានធ្វើការស្រាវជ្រាវ និងចាប់ឃាត់ខ្លួន នៅរសៀលថ្ងៃទី៨ ខែកញ្ញា ឆ្នាំ២០២០។
យុវជនបង្ហោះវីដេអូ Tik Tok នេះមានឈ្មោះ ញ៉ែល ធារីណា ហៅ រី ភេទប្រុស អាយុ ២២ឆ្នាំ មានទីលំនៅភូមិគោកស្រុក ឃុំគោកស្រុក ស្រុកតំបែរ ខេត្តត្បូងឃ្មុំ។
សូមបញ្ជាក់ថា៖ ដីកាបង្គាប់របស់ចៅក្រមស៊ើបសួរសាលាដំបូងខេត្តត្បូងឃ្មុំ ចុះថ្ងៃទី០៩ ខែកញ្ញា ឆ្នាំ២០២០ អង្គភាព «នគរដ្រេហ្គន»ទទួលនៅព្រឹកថ្ងៃទី១០ ខែកញ្ញានេះបានបញ្ជាក់ថា «បញ្ជាឲ្យភ្នាក់ងារមានសមត្ថកិច្ចនៃកម្លាំងសាធារណៈ ធ្វើការនាំខ្លួនជនត្រូវចោទដែលមានឈ្មោះ ញ៉ែល ធារីណា ហៅរី ទៅឃុំខ្លួននៅពន្ធនាគារខេត្តត្បូងឃ្មុំ ដែលអនុវត្តឲ្យបានត្រឹមត្រូវនីតិវិធីនៃច្បាប់»។
បើតាមសមត្ថកិច្ចបានឲ្យដឹងថា ៖ ក្រោយពីបានសាកសួរសាមីខ្លួនបានឆ្លើយថា មូលហេតុដែលយុវជននេះ ចេញវីដេអូដូច្នេះ គឺដោយសារចង់ឃើញមតិប្រតិកម្មរបស់កូនខ្មែរ អំពីបញ្ហាទឹកដី និងចង់ល្បីតាម Tik Tok ដោយមិនមានការរៀបចំ ឬបង្គាប់ឲ្យនិយាយពីអ្នកណាទេ គេធ្វើដោយចិត្តឯង។
យុវជននេះអះអាងថា ចំណងជើងនៃវីដេអូនោះគេបានប្រើពាក្យថា អង្គរវត្តមិនមែនជារបស់ខ្មែរ ប៉ុន្តែជារបស់កម្ពុជា។ ក្រោយមានមតិរិះគន់ច្រើន រូបគេក៏បានលុបវីដេអូនោះចេញវិញ ហើយបានចេញវីដេអូថ្មី សុំទោសជាសាធារណៈ អំពីកំហុសដែលគេបាននិយាយ។
តាមការបញ្ជាក់របស់អាជ្ញាធរមូលដ្ឋានបានឲ្យដឹងថា៖ ជនរូបនេះ ទទួលបានការអប់រំតិចតួច ប៉ុន្តែចេះលេង Tik Tok ស្ទាត់ជំនាញ។ មានន័យថា៖ គេប្រាកដជាមានអង្គការចាត់តាំងប្រើមនោគមន៍វិជ្ជា ឱ្យមានសកម្មភាព ចេតនាទុច្ចរិតញុះញុងឲ្យមានការរើសអើងពូជសាសន៍។
ក្រោយពីបានធ្វើតេស្តពិនិត្យទឹកនោម ដោយសមត្ថកិច្ចជំនាញគ្រឿងញៀន និងគ្រូពេទ្យស្រុក បានត្រួតពិនិត្យសុខភាព បានបញ្ជាក់ថា ជននេះ មិនមានសារធាតុញៀនក្នុងខ្លួន ហើយថែមទាំងមានសុខភាពប្រក្រតី ទាំងកាយសម្បទារ និងផ្លូវចិត្ត ប៉ុន្តែលក្ខណៈធម្មជាតិ អាចជាមនុស្សប្រុសមានចរិតស្រី។ ទីបំផុតរូបគេបានទៅដេកគុកសមតាមបំណងគេប្រព្រឹត្ត ខណៈយុវជនកម្ពុជា កំពុងរួបរួមគ្នា ក្នុងឆន្ទះស្រឡាញ់ និងគាំទ្រប្រមុខរាជរដ្ឋាភិបាល កសាងប្រទេសជាតិឱ្យរីកចម្រើននោះ៕

ដោយ៖ វណ្ណៈ