អន្តរជាតិ៖ ក្រោយពីសហរដ្ឋអាមេរិក បានដកហូតទិដ្ឋាការពីនិស្សិត និងអ្នកស្រាវជ្រាវចិន ប្រមាណជា១០០០នាក់ក្រោមហេតុផលថា លួចស៊ើបការណ៍ឲ្យរដ្ឋាភិបាលចិននោះ ។ ក្រសួងការបរទេសចិន បានប្រតិកម្មទៅវិញភ្លាមៗ ដោយស្នើឲ្យទីក្រុងវ៉ាស៊ីនតោន បញ្ឈប់ការធ្វើទុក្ខបុកម្នេញនិស្សិតចិន ដែលកំពុងរៀនសូត្រនៅទឹកដីអាមេរិក ព្រោះវាប៉ះពាល់ដល់ការផ្លាស់ប្ដូររវាងប្រជាជនប្រទេសទាំងពីរ ។ មិនតែប៉ុណ្ណោះអ្នកនាំពាក្យក្រសួងការបរទេសចិន ក៏បានព្រមានថា ចិនអាចចាត់វិធានការតបវិញ។
ជាក់ស្តែង អ្នកនាំពាក្យក្រសួងការបរទេសចិន លោក Zhao Lijian នាសន្និសីទសារព័ត៌មានមួយកាលពីថ្ងៃទី១០ ខែកញ្ញាថ្មីៗនេះ បានចាត់ទុកថា៖ ការដកហូតទិដ្ឋាការពីនិស្សិត និងអ្នកស្រាវជ្រាវចិន ដោយក្រសួងការបរទេសអាមេរិក នេះគឺជាទង្វើឆ្គាំឆ្គង ដែលផ្ទុយពីការអះអាងរបស់ខ្លួនថា ជាប្រទេសបើកចំហ និងមានសេរីភាព។ ដែលសកម្មភាពនេះ ក៏ដើរផ្ទុយពីការយោបល់របស់សាធារណជនទូទៅក្នុងប្រទេសទាំងពីរ ក៏ដូចជានិន្នាការផ្លាស់ប្ដូររវាងប្រជាជននៅលើពិភពលោកជាទូទៅ។
សូមជម្រាបថា ក្រសួងការបរទេសអាមេរិក កាលពីថ្ងៃទី៩ ខែកញ្ញា ឆ្នាំ២០២០ បានប្រកាសថា ខ្លួនបានលុបចោលទិដ្ឋាការដែលផ្ដល់ឲ្យជនជាតិចិនជាង១០០០នាក់គិតតាំងពីថ្ងៃទី១ ខែមិថុនាមក ដែលក្នុងនោះមានទាំងនិស្សិតកំពុងសិក្សានៅអាមេរិក និងអ្នកស្រាវជ្រាវនៅតាមសាកលវិទ្យាល័យនានាផង។ ការលុបចោលនេះ ជាការអនុវត្តតាមបញ្ជារបស់ប្រធានាធិបតី ដូណាល់ ត្រាំ ដែលតែងចោទចិនថា ប្រើប្រាស់និស្សិតចិនដើម្បីប្រមូលព័ត៌មាននានាឲ្យរដ្ឋាភិបាលប៉េកាំង។
ប៉ុន្តែអ្នកនាំពាក្យក្រសួងការបរទេសចិនលោក Zhao ប្រាប់អ្នកកាសែតជាច្រើនថា សកម្មភាពបែបនេះ ប៉ះពាល់ផលប្រយោជន៍ និងសិទ្ធិស្របច្បាប់របស់និស្សិតចិនដែលកំពុងសិក្សានៅអាមេរិក ហើយក៏ជាការធ្វើទុក្ខបុកម្នេញផ្នែកនយោបាយពេញទី ការរើសអើងជាតិសាសន៍ព្រមទាំងបំពានសិទ្ធិមនុស្សរបស់ជនជាតិចិនទាំងនោះ។ អ្នកនាំពាក្យរូបនេះ ប្រាប់អាមេរិកឲ្យបញ្ឈប់ការរឹតត្បិតដែលគ្មានហេតុផល និងការសង្កត់សង្កិនសិទ្ធិនិស្សិតចិនក្រោមហេតុផលគ្រប់ទម្រង់។
ជាមួយគ្នានេះដែរ មន្ត្រីក្រសួងការបរទេសចិនរូបនេះ ជាសារព្រមានទៅកាន់អាមេរិក លោកនិយាយថា៖«យើងគាំទ្រនិស្សិតចិនក្នុងការការពារសិទ្ទិស្របច្បាប់ និងផលប្រយោជន៍ក្រោមច្បាប់កំណត់។ ចិនរក្សាសិទ្ធិក្នុងការឆ្លើយតបថែមទៀត។»
គួរបញ្ជាក់ថា បច្ចុប្បន្ននេះសិស្សចិនរៀននៅអាមេរិក ប្រភពចំណូលដ៏សំខាន់មួយរបស់បណ្ដាសាកលវិទ្យាល័យអាមេរិកក្នុងកាលៈទេសៈដែលជំងឺ COVID-19 កំពុងរាតត្បាតនោះ។ នៅឆ្នាំ២០១៩ និស្សិចិនមានជិត៣៧ម៉ឺននាក់ រៀននៅអាមេរិក ជាមួយអ្នកស្រាវជ្រាវជាច្រើនទៀត។ យ៉ាងណាមិញ ទីក្រុងវ៉ាស៊ីនតោនអះអាងថា និស្សិតចិនកាន់តែច្រើន បានក្លាយជាឧបករណ៍របស់បក្សកុម្មុយនីស្តចិនក្នុងការលួចស៊ើបការណ៍សំងាត់ពីអាមេរិក៕ដោយ៖ស តារា
