អន្តរជាតិ៖ បន្ទាប់ពីចិន បានធ្វើសមយុទ្ធកងទ័ពជើងទឹកនៅក្បែរឆ្នេរភាគនិរតី និងបញ្ជូនយន្តហោះចម្បាំងហោះចូលដែនអាកាសរបស់តៃវ៉ាន់ ក្នុងរយៈពេលពីរថ្ងៃជាប់គ្នា។ លោក Yeh Kuo-hui អនុប្រធាននាយកដ្ឋានគម្រោង និងប្រតិបត្តិការនៃក្រសួងការពារជាតិតៃវ៉ាន់ កាលពីថ្ងៃទី១០ ខែកញ្ញា ឆ្នាំ២០២០ បានប្រកាសថា៖ តៃវ៉ាន់ ត្រូវតែត្រៀមខ្លួនឲ្យបានរួចរាល់ ក្នុងការធ្វើសង្គ្រាមជាមួយចិន។
ជាក់ស្តែង បើតាមការចុះផ្សាយរបស់ទីភ្នាក់ងារព័ត៌មាន Reuters បានចេញផ្សាយថា កាលពីថ្ងៃទី១០ ខែកញ្ញាកន្លងទៅ លោកYeh Kuo-hui អនុប្រធាននាយកដ្ឋានគម្រោង និងប្រតិបត្តិការនៃក្រសួងការពារជាតិតៃវ៉ាន់ បានលើកឡើងយ៉ាងដូច្នេះនៅក្នុងសន្និសីទសារព័ត៌មានបន្ទាន់មួយថា៖«យើងត្រូវតែរៀបចំឲ្យបានគ្រប់គ្រាន់ទាំងអស់ ដើម្បីរួចរាល់ក្នុងការធ្វើសង្គ្រាម»។ ការលើកឡើងរបស់លោកYeh បែបនេះធ្វើឡើងបន្ទាប់ពីយន្តហោះចម្បាំងចិនប្រភេទ Su-30 និងJ-10 ជាច្រើនគ្រឿង បានហោះចូលក្នុងដែនអាកាសរបស់តៃវ៉ាន់២ថ្ងៃជាប់គ្នា។
ជាមួយគ្នានេះ លោកYeh Kuo-hui ក៏បានទទូចឲ្យចិនគ្រប់គ្រងកងទ័ពរបស់ខ្លួនឲ្យបានត្រឹមត្រូវផងដែរ ដើម្បីបញ្ចៀសការប៉ះទង្គិចណាមួយជាពិសេសគឺយន្តហោះចម្បាំងរបស់ចិន ដែលហោះចូលតំបន់ឆ្លើយតបរបស់តៃវ៉ាន់។
បើយោងតាមរាយការណ៍តៃវ៉ាន់ ថា៖ ចិនបានធ្វើសមយុទ្ធកងទ័ពជើងទឹក និងអាកាស នៅក្បែរឆ្នេរភាគនិរតីរបស់ខ្លួន ដែលសកម្មភាពនេះទីក្រុងតៃប៉ិបានចាត់ទុកថា គឺជាសកម្មភាពគំរាមរបស់ចិន ដើម្បីឲ្យតៃវ៉ាន់ទទួលយកច្បាប់ ឬតាមសំណើរបស់ចិន ក្នុងការបង្រួបបង្រួមប្រទេស។ សមយុទ្ធយោធានេះ បានធ្វើឡើងនៅចន្លោះកោះតៃវ៉ាន់ និងប្រជុំកោះ Pratas ដែលស្ថិតក្រោមការគ្រប់គ្រង់របស់តៃវ៉ាន់ផងដែរ។ ហើយសមយុទ្ធយោធារបស់ចិន កំពុងគំរាមកំហែងស្ថិរភាពក្នុងតំបន់ និងបង្កគ្រោះថ្នាក់ដល់ការហោះហើរអន្តរជាតិ។ មិនតែប៉ុណ្ណោះលោកYeh បានយល់ឃើញបែបនេះ និងប្រាប់ទៅចិនថា៖ «យើងសូមនិយាយម្តងទៀត កុំមើលស្រាលការប្តេជ្ញារបស់យោធាតៃវ៉ាន់ក្នុងការការពារទឹកដី។ យើងជឿជាក់ និងអាចការពារប្រទេសរបស់យើង»។
សូមជម្រាបផងដែរថា តៃវ៉ាន់ ក៏បានចែករំលែកព័ត៌មាននេះជាមួយសម្ព័ន្ធមិត្តរបស់ខ្លួនផងដែរ។ ហើយសហរដ្ឋអាមេរិក ទំនងជាប្រទេសដែលតៃវ៉ាន់ផ្ដល់ព័ត៌មានលើសកម្មភាពយោធារបស់ចិន។ ជុំវិញបញ្ហានេះ មន្ទីរបញ្ចកោណអាមេរិក ក៏អះអាងដែរថា៖ ខ្លួនបានតាមដានសមយុទ្ធយោធានេះយ៉ាងម៉ត់ចត់។
គួរបញ្ជាក់ថា ចិនមួយរយៈចុងក្រោយនេះ បានបង្កើនការធ្វើសមយុទ្ធយោធាលើទឹកយ៉ាងខ្លាំងបំផុត។ បន្ទាប់ពីធ្វើសមយុទ្ធយោធានៅក្នុងសមុទ្រចិនខាងត្បូងនៅក្នុងខែសីហាកន្លងទៅ ចិនបានធ្វើសមយុទ្ធនៅក្នុងសមុទ្រ Bohai នៅថ្ងៃទី៧ ខែកញ្ញា និងនៅភាគខាងត្បូងនៃសមុទ្រលឿង នៅថ្ងៃទី៨ និង៩ ខែកញ្ញា។ ខណៈសមយុទ្ធយោធាចុងក្រោយ គឺនៅក្បែរឆ្នេរភាគនិរតីរបស់តៃវ៉ាន់តែម្តង៕ដោយ៖ស តារា
