នៅក្នុងខេត្ត(ជ្វា) Java ភាគខាងកើត ពលរដ្ឋដែលមិនពាក់ម៉ាស់​នៅទីសាធារណៈនឹងត្រូវទទួលការផាកពិន័យឲ្យជីកផ្នួរសម្រាប់កប់សពអ្នកស្លាប់ដោយកូវីដ​-១៩ ។ ការធ្វើបែបនេះ គឺដើម្បីឲ្យពលរដ្ឋ​មានការយល់ដឹងដើម្បីទប់ស្កាត់ការឆ្លងកូវីដ​-១៩ ។ ការមិនពាក់ម៉ាស់ គឺអាចបណ្តាលឲ្យស្លាប់បានគ្រប់ពេល ដោយការឆ្លងកូវីដ​-១៩​។
ដោយសារតែ​ចំនួនអ្នកស្លាប់ដោយកូវីដ​-១៩ កើនឡើងខ្ពស់នៅក្នុងប្រទេសឥណ្ឌូនេស៊ី ហើយទីតាំងកប់សពនៅតែ១១០០ទៀតប៉ុណ្ណោះ។ នៅក្នុងភូមិ Ngabetan មានមនុស្ស​៨នាក់មិនពាក់ម៉ាស់ត្រូវចាប់ឱ្យជីករណ្តៅសម្រាប់កប់សពមួយកន្លែង ។
កិច្ចការជីកផ្នូរ​ គឺត្រូវចំណាយកម្លាំងចំណាយពេលវេលា និងថាមពលច្រើន។ ទាំងនោះហើយបានជាមន្ត្រីក្នុងតំបន់បានសម្រេចផាកពិន័យ អ្នកមិនគោរពច្បាប់ ដើម្បីទប់ស្កាត់ការឆ្លងកូវីដ​-១៩ ពិសេសគឺមិនពាក់ម៉ាស់នៅទីសាធារណៈ។ មន្ត្រីក្នុងតំបន់បានឲ្យដឹងថា ការផាកពិន័យបែបនេះគឺជាការដាស់តឿនដល់ពលរដ្ឋឲ្យប្រុងប្រយ័ត្នទាំងអស់គ្នា។
តាមគេហទំព័រ Worldometer គិតដល់វេលាម៉ោង ៦ល្ងាចថ្ងៃទី​១៥ខែកញ្ញា​ចំនួនអ្នកឆ្លងកូវីដ​-១៩ ក្នុងប្រទេសឥណ្ឌូនេស៊ីបានកើនឡើងដល់ទៅ​225,030នាក់ និងស្លាប់ 8,965 នាក់ ។ ជាមួយគ្នានេះដែរ ក៏មានអ្នកព្យាបាលជាសះស្បើយដល់ទៅ161,065ផងដែរ៕