ភ្នំពេញ៖ ដោយមានការបង្ហាញផ្ទាល់ដោយ ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានដាក់បញ្ជាឲ្យលោកឧត្តមសេនីយ៍ទោ ឈាង ផាន់ណារ៉ា ស្នងការរង ទទួលផែនគ្រប់គ្រងអាវុធជាតិផ្ទុះ និងអគ្គិភ័យ ត្រូវលុបបំបាត់កន្លែងលក់ហ្គាសអាណាធិបតេយ្យឲ្យអស់ក្នុងភូមិសាស្រ្ត រាជធានីភ្នំពេញ ដើម្បីកាត់បន្ថយហានិភ័យគ្រោះថ្នាក់របស់ប្រជាពលរដ្ឋ។
ក្រោយពីទទួលបានបទបញ្ជានេះរួចមក នៅព្រឹកថ្ងៃទី២២ ខែកញ្ញា ឆ្នាំ២០២០នេះ លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ បានណែនាំឲ្យលោកវរសេនីយ៍ទោ ឯម គឹមហ៊ុល នាយរងការិយាល័យ, លោកអនុសេនីយ៍ឯក សុង សោភ័ណ្ឌ នាយរងផ្នែកអគ្គិភ័យ ដោយបានសហការជាមួយកម្លាំងសមត្ថកិច្ចខណ្ឌ-ប៉ុស្តិ៍ បន្តចុះធ្វើការត្រួតពិនិត្យទីតាំងលក់សាំងចំនួន ៣ទីតាំង។
ទីតាំងទី១ យីហោ ស្ថានីយ៍ប្រង ឥន្ធនៈ កាល់ទិច ដោយមានម្ចាស់ឈ្មោះ ហួត ម៉ាន់ណា ភេទប្រុស អាយុ ៤៨ឆ្នាំ ដែលស្ថិតនៅចំណុចដីឡូត៍លេខ៣២៤-៣២៦ តាមបណ្តោយផ្លូវព្រះមុនីវង្ស សង្កាត់ចតុមុខ ខណ្ឌដូនពេញ។
ទីតាំងទី២ យីហោ ស្ថានីយ៍ប្រេងឥន្ធនៈ សូគីមិច ប៉ាស្ទ័រ និងលក់ហ្គាស ដែលមានម្ចាស់ឈ្មោះ ម៉ៅ វន ភេទប្រុស អាយុ ៣២ឆ្នាំ ដែលស្ថិតនៅចំណុចដីឡូតិ៍លេខ១៦៥ ផ្លូវ២៤០ សង្កាត់ចតុមុខ ខណ្ឌដូនពេញ។
ទីតាំងទី៣ យីហោ ស្ថានីយ៍ប្រេងឥន្ធនៈ ភី.ធី.ធី ដោយមានម្ចាស់ឈ្មោះ តេង គីមសេង ភេទប្រុស អាយុ ២៦ឆ្នាំ ដែលស្ថិតនៅចំណុចផ្លូវ២៤០ ភូមិ០៤ សង្កាត់ចតុមុខ ខណ្ឌដូនពេញ។
ដោយនៅក្នុងទីតាំងចំនួន ៣កន្លែង ដែលកម្លាំងជំនាញយើងធ្វើការចុះត្រួតពិនិត្យមើលនោះ ពិតជាមានច្បាប់អនុញ្ញាតប្រកបអាជីវកម្មពិតប្រាកដត្រឹមត្រូវ។
ក្រោយពីធ្វើការត្រួតពិនិត្យមើលទីតាំងចំនួន ៣ រួចមក កម្លាំងជំនាញរបស់យើងបានធ្វើការណែនាំ និងអប់រំដល់ម្ចាស់ទីតាំង ដែលប្រកបអាជីវកម្មលក់សាំងទាំងអស់ ដោយមានការប្រុងប្រយ័ត្នខ្ពស់ជៀសវាងបង្កគ្រោះថ្នាក់ជា យថាហេតុ កើតឡើង៕
