ខេត្តកំពង់ចាម៖ អាជីវករផ្សារសាមគ្គី អតីតផ្សារសាលាចិនស្ថិតនៅក្រុងកំពង់ចាម ដែលទើបចូលលក់ដូរសារជាថ្មីបានប្រមាណ២សប្ដាហ៍កន្លងទៅនេះបានរអ៊ូរទាំយ៉ាងខ្លាំង ពីសំណាក់ក្រុមអាជីវករ ចំពោះកង្វះខ្យល់អុកស៊ីសែន និងបរិយាកាសក្នុងផ្សារ ដោយការសាងសង់មិនតាមស្តង់ដារគឺជញ្ជាំង និងដំបូលផ្សារធ្វើឡើងដោយដែកស័ង្កសី និងមានលក្ខណៈទាបគ្មានព្រឹលខ្យល់គ្រប់គ្រាន់ គ្មានតុល្យភាពជាមួយបរិមាណធ្វើឲ្យអាជីវករ និងអតិថិជនដែលអង្គុយលក់ដូរ និងមករកទិញត្រីសាច់បន្លែមិនបាននៅយូរព្រោះចង់ថប់ដង្ហើម។
អាជីវករក្នុងផ្សារបានលើកឡើងក្នុងន័យត្អូញត្អែរចំពោះម្ចាស់ម៉ៅការផ្សារ គឺអ្នកស្រីថាន់ អៀងលី ដែលបានឲ្យភ្នាក់ងារ ឬបុគ្គលិកក្រោមឱវាទរបស់ខ្លួនយកថ្លៃភាស៊ីពីអាជីវករក្នុង១ថ្ងៃ២ ដងគឺនៅពេលព្រឹកគឺក្នុងទំហំ១ម៉ែត្រក្រឡាចំនួន១០០០រៀល។ ចំណែកកន្លែងលក់ត្រីគឺពេលព្រឹកតម្លៃ១៥០០រៀល ពេលល្ងាចតម្លៃ១០០០រៀលក្នុង១កន្លែងៗ។ ការយកថ្លៃភាស៊ីខាងលើនេះវាផ្ទុយពីសៀវភៅបន្ទុកដែលឲ្យយក៣០០រៀលក្នុងមួយកន្លែងដូចខាងលើ។
អាជីវករបានបញ្ជាក់ថា ចំណែកថ្លៃផ្ញើម៉ូតូក្នុង១គ្រឿងភាស៊ីយកថ្លៃ១០០០រៀល ដែលក្នុងសៀវភៅបន្ទុកយកតែ៥០០រៀល។ ម្យ៉ាងទៀតកន្លែងផ្ញើម៉ូតូមានទីធ្លាតូចខ្លីមិនអាចផ្ញើម៉ូតូបាន ច្រើនឡើយធ្វើឲ្យបងប្អូនដែលចង់ចូលទិញទំនិញក្នុងផ្សារសាមគ្គីនេះ មិនសូវចូលមកទិញទំនិញក្នុងផ្សារនេះឡើយ។
ប្រភពដដែលបន្តថា ក្នុង១ថ្ងៃៗត្រូវបង់ថ្លៃអំពូល១ និងកង្ហារ១តម្លៃ៥០០រៀល និងថ្លៃសេវាតអគ្គិសនី១កន្លែង៦០០០០រៀលទៀត។
អាជីវករសំណូមពរដល់លោកអភិបាលខេត្តលោកអភិបាលក្រុងកំពង់ចាមមេត្តា ចុះពិនិត្យផ្សារសាមគ្គីថ្មីនេះផង និងសុំឲ្យម្ចាស់អាជីវករសាងសង់ផ្សារជួយសម្រួលធ្វើបង្អួចព្រឹល ខ្យល់ឲ្យបានធំទូលាយសមស្របតាមបរិមាណអ្នកលក់ និងទំហំទីកន្លែងផង និងសុំបន្ធូរបន្ថយការយកថ្លៃភាស៊ីគឺយកតាមសៀវភៅបន្ទុក។
គួររំលឹកដែរថា ផ្សារសាមគ្គីនេះជាអតីតសាលារៀនចិន ហើយក្រោយថ្ងៃរំដោះ៧មករា ១៩៧៩សាលានេះក្លាយជាផ្សារសាលាចិន ក្រោយមកបានឲ្យអាជីវករទាំងនេះទៅលក់នៅក្បែរស្ពានគីហ្សូណា ដើម្បីយកទីធ្លាសាងសង់ផ្សារសាជាថ្មី ហើយបានចាប់ឆ្នោតឲ្យអាជីវករចូលលក់ជាថ្មីនៅថ្ងៃទី១ ខែមករា ឆ្នាំ២០១៦ ។
ជាទូទៅបញ្ហាអនុវត្តសៀវភៅបន្ទុកនៅទូទាំងខេត្តកំពង់ចាមមិនត្រូវបានអនុវត្តទេ ។ នៅតាម ផ្សារតម្លៃភាស៊ីផ្ញើកង់ឡើងថ្លៃស្រេចចិត្ត ។ រីឯនៅតាមកំពង់ចម្លងថៅកែកំណត់តម្លៃឆ្លងលើម៉ូតូ-រថយន្ត ស្រេចតែចិត្តនឹកឃើញ ។ គេនិយាយថា ខេត្តកំពង់ចាមតែងតែយ៉ាងនេះហើយ ៕
ដោយ៖ ហេង នរិន្ទ្រ
